Lést af völdum ó­hóf­legs lakkrís­áts

Læknar í Bandaríkjunum segja að byggingaverkamaður í Massachusetts hafi látist af völdum óhóflegs lakkrísáts.

BBC segir frá því að maðurinn, sem var 54 ára, hafi borðað um einn og hálfan pakka af lakkrís á dag. Hann hafi ekki sýnt nein sérstök einkenni áður en hann hafi skyndilega fengið hjartastopp á skyndibitastað.

Mál mannsins er til umfjöllunar í fræðigrein í New England Journal of Medicine þar sem fram kemur að glýsyrrisínsýran í lakkrísnum hafi verið um að kenna.

„Okkur var sagt að mararæði sjúklingsins hafi verið slæmt og að hann hafi borðað mikið magn sælgætis. Má vera að veikindi hans megi rekja til sælgætisneyslunnar,“ spyr Dr Elazer R Edelman sem fór fyrir hópi greinarhöfunda. 

Edelman segir að glýsyrrisínsýran gæti vel hafa valdið háþrýstingi, kalíumskorti, blóðlýtingu, hjartsláttartruflunum og nýrnabilunum. Allt voru þetta einkenni í sjúklingnum.

Einnig kemur fram að hinn látni hafi, nokkrum vikum fyrir andlátið, skipt um þá lakkrístegund sem hann neytti í miklu óhófi, úr rauðum í svartan.