Býst við að ákvörðun um sjópróf verði tekin mjög fljótlega

Stéttarfélög áhafnarinnar á Júlíusi Geirmundssyni hafa ákveðið að kæra framgöngu Hraðfrystihússins Gunnvarar til lögreglu vegna meðferðarinnar á skipverjunum í síðasta veiðitúr togarans. Formaður Verkalýðsfélags Vestfjarða segist búast við því að niðurstaða um hvort sjópróf verði haldin í málinu muni liggja fyrir mjög fljótlega.

Tuttugu og tveir af 25 skipverjum sýktust af kórónuveirunni sem kom upp um borð fljótlega eftir að skipið lagði út á haf. Þrátt fyrir það hélt skipið áfram veiðum í túr sem tók þrjár vikur og hefur framganga útgerðarfélagsins verið harðlega gagnrýnd.

Félögin standa þétt saman í málinu

Finnbogi Sveinbjörnsson formaður Verkalýðsfélags Vestfjarða segir í samtali við fréttastofu að félögin standi þétt saman að málarekstrinum og að nú sé málið í höndum lögmanna þeirra. Kæran hafi ekki verið lögð fram en að lögmenn félaganna vinni nú að því auk þess sem krafa um sjópróf verði gerð.

Haft var eftir Karli Inga Vilbergssyni lögreglustjóra á Vestfjörðum á Vísi í gær að ólíklegt væri að sjópróf færu fram, það heyri til undantekninga að slíkt sé gert. Aðspurður segir Finnbogi að það sé aðeins tilfinning Karls Inga fyrir málinu, sjálfur vilji hann ekki leggja mikið út af því, nú sé það lögmanna að leggja fram kröfuna fyrir héraðsdómi og það komi þá í ljós hvort slík próf verði haldin.

Sjópróf eru forgangsmál í kerfinu

Finnbogi bendir á að sjópróf séu forgangsmál og hljóta því flýtimeðferð í kerfinu. Því segist hann búast við því að ákvörðun um sjópróf muni liggja mjög fljótlega fyrir

Þá vinni lögmenn stéttarfélaganna jafnhliða að því að leggja fram kæru til lögreglu vegna málsins.

Umrædd stéttarfélög eru auk Verkalýðsfélags Vestfjarða, Félag skipstjórnarmanna, Sjómannafélag Íslands, Sjómannasamband Íslands og VM - félag vélstjóra og málmtæknimanna.

SGS lýsir yfir fullum stuðningi við málareksturinn

Þá barst sjómönnunum á Júlíusi Geirmundssyni stuðningsyfirlýsing frá Starfsgreinasambandinu þar sem tekið er undir með hinum hinum stéttarfélögunum að hunsun á tilmælum yfirvalda um viðbrögð við hópsmiti sé vítaverð og fram þurfi að fara sjópróf til að draga þá til ábyrgðar sem hana bera. Skeytingarleysi gagnvart heilsu og öryggi skipverja megi aldrei líðast.