Kjartan ekki hrifinn af mynd­bands­dómgæslu: Hægir á leiknum og of mikið af vafa­at­riðum

Þetta kom í ljós í viðtali danska miðilsins Bold.dk við Kjartan Henry eftir 2-1 tap Horsens gegn Bröndby um helgina. Kjartan skoraði eina mark Horsens en það dugði ekki að þessu sinni.

Í viðtalinu var rifjað upp þegar Kjartan skoraði tvívegis fyrir Horsens gegn Bröndby árið 2018 í 2-2 jafntefli liðanna. Missti Bröndby af danska meistaratitlinum vegna jafnteflisins.

„Get viðurkennt að mörkin gegn Bröndby fyrir tveimur árum rifjuðust upp fyrir manni. Þá voru allt aðrar aðstæður en núna. Veðrið var frábært, leikvangurinn fullur af stuðningsfólki og eitthvað í loftinu,“ sagði Kjartan Henry við Bold.

„Núna var leikið án áhorfenda og stuðst við myndbandsdómgæslu sem ég er ekki hrifinn af. Hún hægir á leiknum og það er of mikið af vafaatriðum og ósvöruðum spurningum þegar leik lýkur. Það eru fjórar manneskjur í sendibíl sem fylgjast með og ákveða hvað gerist á vellinum.“

„Ég er lítill aðdáandi VAR en það er ekki ég sem stjórna,“ sagði Kjartan Henry að lokum.

Horsens hefur ekki gengið vel það sem af er leiktíð og aðeins unnið einn leik af 13 til þessa. Er liðið með sex stig og ljóst að það þarf að bíta í skjaldarrendur ef ekki á illa að fara.