Houston tókst loksins að vinna leik eftir tuttugu töp í röð

Houston Rockets endaði tuttugu leikja taphrinu með 117-99 sigri á Toronto Raptors. John Wall náði þar sinni fyrstu þrennu í fimm ár en hann var með 19 stig, 10 stoðsendingar og 11 fráköst.

Rockets liðið var farið að nálgast NBA-metið en þetta er níunda lengsta taphrina sögunnar. Philadelphia 76ers á enn metið en liðið tapaði 28 leikjum í röð árið 2015.

Stephen Silas, þjálfara Houston Rockets, fannst lið hans sjá réttu merkin á lofti þegar Danuel House Jr. setti niður skot af fimmtán metra skot á flautu fyrri hálfleiks.

„Ég hugsaði: Vá, kannski er þetta kvöldið. Þetta var eins og eitthvað sérstakt hefði gerst fyrir okkur. Þetta var líka mjög sérstakt kvöld eftir öll þessi töp í röð,“ sagði Stephen Silas. Houston Rockets hafði ekki unnið leik síðan 4. febrúar.

Kawhi Leonard skoraði 25 stig og Terance Mann var með 21 stig þegar Los Angeles Clippers vann upp 22 stiga forskot Atlanta Hawks og tryggði sér 119-110 sigur. Luke Kennard hitti úr öllum átta skotum sínum og skoraði 20 stig fyrir Clippers liðið í seinni hálfleik.

Trae Young skoraði 28 stig og gaf 8 stoðsendingar og John Collins var með 23 stig fyrir Atlanta Hawks en þetta var fyrsta tap liðsins í marsmánuði eftir átta sigurleiki í röð. Nate McMillan tók við Hawks liðinu og byrjaði frábærlega en sá nú liðið sitt tapa í fyrsta sinn eftir hrun í seinni hálfleik sem Clippers vann 71-47.

Ja Morant var með 29 stig og 9 stoðsendingar þegar Memphis Grizzlies vann 132-126 sigur á Boston Celtics í framlengdum leik. Dillon Brooks bætti við 24 stigum, 7 fráköstum og 7 stoðsendingum í þriðja sigri Grizzlies í síðustu fjórum leikjum. Jonas Valanciunas var með 16 stig og 19 fráköst.

Jaylen Brown var stigahæstur hjá Boston með 27 stig og Jeff Teague skoraði 26 stig. Celtics liðið lék án Kemba Walker og Jayson Tatum var veikur. Þetta var sjötta tap Boston í röð þegar liðið er að spila annað kvöldið í röð.

Milwaukee Bucks vann sinn sjöunda leik í röð og það þrátt fyrir að leika án Giannis Antetokounmpo. Jrue Holiday var með 28 stig og 14 stoðsendingar í 140-113 sigri Bucks á Indiana Pacers. Pat Connaughton kom inn í byrjunarliðið fyrir Giannis, skoraði 20 stig, tók 9 fráköst og hitti úr 6 af 7 þriggja stiga skotum sínum.

Donovan Mitchell skoraði 30 stig og franski miðherjinn Rudy Gobert var með 21 stig, 10 fráköst og 9 varin skot þegar Utah Jazz vann 120-95 útisigur á Chicago Bulls. Utah er með besta árangurinn í Vesturdeildinni og vann þarna sinn annan leik í röð og er að komast aftur í gang eftir að hafa tapað fimm af átta leikjum þar á undan.