Mjög sárt en virðist sem betur fer í fínu lagi

Jakob meiddist í sigri KR gegn Val á Hlíðarenda á sunnudagskvöld eftir að hafa skollið með hnéð illa í Pavel Ermolinski eins og sjá má á myndbandinu hér að neðan.

„Þetta var mjög sárt enda reyndi ég að koma aftur inn á en það gekk bara ekki. Mér fannst bara löppin óstöðug og maður hafði smááhyggjur eftir leikinn af því hvað hefði nákvæmlega gerst. En sem betur fer virðist þetta vera í fínu lagi,“ segir Jakob við Vísi í dag.

„Ég verð með í kvöld og er í ágætis standi. Ég reyndi vel á þetta í gær með hlaupum og slíku og það kom bara vel út.“

Mikið hefur verið fjallað um einvígi KR og Vals og baráttan verið hörð en afar skemmtileg áhorfs hingað til. KR er 2-1 yfir og vantar því aðeins einn sigur til að komast í undanúrslit Dominos-deildarinnar.

„Maður finnur alveg að það er mikill áhugi á þessari seríu. Það eru allir hérna í Vesturbænum með á nótunum, tala um þetta og fylgjast með. Þetta er líka búin að vera geggjuð sería hingað til. Rosalega skemmtilegir leikir. Það er ekkert skrýtið að fólk, ekki síst það sem fylgist ekki reglulega með körfubolta, sé að dragast inn í þetta. Það er búin að vera mikil stemning, tvö góð lið og jafnir leikir, og mikið að gerast í hverjum leik,“ segir Jakob.

Í gær tóku gildi nýjar reglur á Íslandi sem leyfa tvöfalt fleiri áhorfendur en áður, eða 300 manns í hverju sóttvarnahólfi. Stemningin hefur verið mikil á leikjunum hingað til og verður eflaust ekki minni í DHL-höllinni í kvöld:

„Við fögnum þessu. Við vitum alveg að það hafa fleiri viljað komast á leikina en félögin mega leyfa. Því fleiri sem komast, því betra.

Við ætlum að gera allt sem við getum til að klára þetta á heimavelli. Okkur finnst við eiga að hafa getað gert betur á heimavelli í vetur og núna er gott tækifæri til að bæta upp fyrir þessa tapleiki okkar á heimavelli. Við erum „peppaðir“ og tilbúnir í þetta,“ segir Jakob.