Um Örnu Sif og Murielle: Það var al­vöru ein­vígi og gaman að sjá þær mætast út á velli

Dómgæslan í leiknum var til umræðu. Til að mynda aukaspyrna sem Hugrún Pálsdóttir fékk þegar Snædís Ósk Aðalsteinsdóttir, varnarmaður Þór/KA, náði boltanum fullkomlega. Upp úr aukaspyrnunni kom mark Tindastóls í leiknum.

Murielle Tiernan stangaði þá fyrirgjöf Laufeyjar Hörpu Halldórsdóttur í netið.

„Þarna furðaði ég mig aðeins á því að Arna Sif [Ásgrímsdóttir] fylgdi henni ekki inn. Hún var að taka svæði. Ég hefði viljað sjá hana ráðast á þennan leikmann því Murielle virkar svo sterk og stór,“ sagði Helena Ólafsdóttir, þáttastjórnandi.

Mist Rúnarsdóttir tók í sama streng.

„Það er alveg alvöru einvígi og það var gaman að sjá þær mætast út á velli. Tveir alveg hörku, hörku leikmenn.“

Þá var frammistaða Tindastóls einnig til umræðu. Margrét Lára Viðarsdóttir hrósaði spilamennsku þeirra.

„Þær eru skipulagðar, flottar í þessum föstu leikatriðum, fínar í skyndisóknum og með fínan hraða fram á við sem getur brotið upp flestar varnir. Komast í 1-0 sem er mjög góð staða fyrir svona lið. Geta þá farið í skotgrafirnar og reynt að halda núllinu en það gekk ekki í dag. Held samt að þær geti verið sáttar með hvernig þær eru að byrja þetta, eru að gefa öllum leik og eru nokkuð sprækar.“

Pepsi Max deild kvenna er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.