Breskir tón­listar­menn æra­st ekki af fögnuði yfir auknu að­gengi að Ís­landi

Breska ríkisútvarpið fjallar um málið og segir að viðtökur listamanna sem sækja stóran hluta tekna sinna í tónleikahald víða um heim og hafa ekki getað farið í tónleikaferðalög um Evrópu jafn auðveldlega og fyrir útgöngu Bretlands úr Evrópusambandinu hafa verið dræmar.

„Íbúafjöldi Íslands er um það bil sá sami og Wigan. Það búa svipað margir í Liechtenstein og í Wilsmslow,“ tísti Tim Burgess, leiðtogi sveitarinnar The Charlatans og virtist ekki sérlega hrifinn af því hvernig Dowden reiddi fram fréttirnar um aukið aðgengi tónlistarfólks að mörkuðum ríkjanna þriggja.

„Ef þetta væri ekki sorglegt þá væri þetta fyndið,“ tísti Burgess og bætti því við að sveit hans hefði í yfir þrjátíu ár spilað víðs vegar um heiminn. Hún hefði hins vegar aldrei spilað á Íslandi eða í Liechtenstein vegna mikils kostnaðar, fólksfjölda, eða heldur skorts þar á, og þess hve fáa tónleikastaði og tónleikahaldara er þar að finna.

Mat Osman, trommari rokksveitarinnar Suede, sagði um aumkunarverðar ráðstafanir að ræða.

„Ah, já. Hinn sígildi Noregs/Íslands/Liechtenstein-túr. Algjörlega aumkunarvert,“ tísti hann.

Yfir þúsund manns hafa deilt tísti ráðherrans þar sem hann greinir frá breytingunni sem fylgir samningnum. Flestir eiga það sameiginlegt að þykja ráðstöfunin heldur lítilvæg og hafa margir netverjar ekki staðist mátið og kallað ráðherrann eins og einu uppnefni í leiðinni.

Bresk stjórnvöld hafa bent á að ráðahagurinn, að auðvelda tónlistarmönnum frá Bretlandi að fara og spila í áðurnefndum löndum, sé aðeins hluti af viðleitni þeirra til að auðvelda tónlistarfólkinu að ferðast um gervalla Evrópu og leika listir sínar.

Fátt um stjörnufans hér á landi

Breska ríkisútvarpið hefur tekið saman hversu oft þeir tíu tónlistarmenn eða hljómsveitir sem hvað bestu gengi hafa átt að fagna þegar litið er til tónleikaferðalaga hafa spilað á Íslandi, í Noregi og Liechtenstein síðasta áratug.

Umræddir listamenn eru: Rolling Stones, Ed Sheeran, Coldplay, Paul McCartney, Roger Waters, One Direction, Elton John, Depeche Mode, Rod Stewart og Take That.

Af þessum tíu hefur aðeins Ed Sheeran spilað á Íslandi síðasta áratug, alls tvisvar. Það gerði hann dagana 10. og 11. ágúst árið 2019 þegar hann spilaði á Laugardalsvelli. Allir höfðu spilað minnst einu sinni í Noregi á tímabilinu, utan Take That. 

Af þessum hljómsveitum og tónlistarmönnum hafði þó enginn lagt leið sína til Liechtenstein til að spila.

Krefjast breytinga

Í kjölfar útgöngu Bretlands úr Evrópusambandinu í janúar á síðasta ári breyttust starfsskilyrði breskra listamanna sem vilja troða upp í Evrópusambandinu töluvert. Í krafti fjórfrelsis Evrópusambandsins, sem fól í sér óhefta för og frelsi til vinnu innan sambandsins gátu tónlistarmenn ferðast og spilað óáreittir.

Nú er öldin þó önnur og geta breskir tónlistarmenn, í krafti útgöngusamnings Breta við ESB, aðeins ferðast um Evrópu í 90 daga innan 180 daga ramma. Þeir þurfa þó sérstaklega að fá vegabréfsáritun vegna launaðrar vinnu vilji þeir spila í Portúgal og á Spáni, til að mynda.

Í janúar á þessu ári skrifaði fjöldi þekktra tónlistarmanna í Bretlandi, þar á meðal Íslandsvinurinn Sheeran, bréf til ríkisstjórnarinnar þar sem þess var farið á leit við hana að greitt yrði úr málinu.

Um mánuði síðar leiddi könnun lægri deildar breska þingsins það í ljós að yfir 80 prósent þeirra tónlistarmanna sem skrifað höfðu undir undirskriftalista, þar sem þess var krafist að tónlistarmenn ættu þess kost að fara í tónleikaferðalög um Evrópu án sérstakrar vegabréfsáritunar, teldu líklegt að þeir myndu að öðrum kosti hætta að fara í tónleikaferðalög til Evrópusambandsríkja.

Sem stendur er því óljóst hvort aukinn aðgangur breskra tónlistarmanna að Íslandi, Noregi og Liechtenstein muni verða til þess að stórstjörnur þaðan muni streyma hingað í meiri mæli en áður. Af viðbrögðum við tilkynningu breskra stjórnvalda að dæma verður þó að telja það ólíklegt.