Heimild veitt fyrir örvunarskömmtum fyrir fólk með skert ónæmiskerfi

Heimildin sem stofnunin gaf út er fyrir líffæraþega eða fólk með sjúkdóma sem skerða starfsemi ónæmiskerfisins á sambærilegan hátt, að sögn Reuters-fréttastofunnar. Það er um 3% Bandaríkjamanna, að sögn AP-fréttastofunnar. Heilbrigðisyfirvöld í Bandaríkjunum hafa sagt að fólk með veikt ónæmiskerfi njóti mögulega ekki nægilegrar verndar af bóluefnum gegn kórónuveirunni.

Bæði Pfizer og Moderna hafa sagt að virkni bóluefnis þeirra dofni með tímanum. Rannsókn benti til þess að virkni Pfizer-bóluefnisins minnkaði úr 96% í 84% fjórum mánuðum eftir seinni skammt. Moderna segist telja þörf á örvunarskömmtum í ljósi þess að fullbólusett fólk hefur smitast af delta-afbrigðinu.

Sérfræðingar eru ekki á einu máli um hvort að rétt sé að ráðast í almenna endurbólusetningu gegn Covid-19 hjá fullfrísku fólki þar sem ekki liggi fyrir hver ábatinn af örvunarskammtum sé.

Þá hvatti Alþjóðaheilbrigðisstofnunin til þess að ríki biðu með endurbólusetningu fram á haustið að minnsta kosti til þess að gefa þróunarrríkjum færi á að frumbólusetja sitt fólk.