Kvarta yfir „eitraðri framkomu“ stjórnenda Hugarafls

Hugarafl eru félagasamtök fólks sem hefur upplifað persónulega krísu og vinnur að bata sínum.

Stefán Þór Stefánsson er í hópnum sem um ræðir. Hann hefur á undanförnum árum unnið sig út úr kvíða og þunglyndi sem hrjáðu hann til langs tíma. Árið 2015 kynntist hann Hugarafli og hefur verið virkur í starfseminni síðan.

Fyrr á þessu ári missti Stefán unnustu sína, Tinnu Finnsdóttur, í sjálfsvígi en hún hafði verið skjólstæðingur Hugarafls og er að sögn Stefáns ein þeirra sem hlaut mjög ómaklega meðferð af hálfu stjórnenda samtakanna.

Hann sagði Tinnu hafa lýst fyrir sér undarlegum uppákomum og hegðun stjórnanda sem hann kannaðist sjálfur við en hafði þó leitt hjá sér. Það var síðan ekki fyrr en þau Tinna fóru að vera saman sem par, í byrjun þessa árs, sem hann fór að átta sig á að framkoma stjórnanda Hugarafls gagnvart henni hafi ekki verið eðlileg. Frásagnir Tinnu af því andlega ofbeldi sem hún varð fyrir í Hugarafli hafi opnað augu hans fyrir því að umhverfið þarna væri ekki eins og það ætti að vera en helsti gerandinn í því ofbeldi var að sögn Stefáns, aðal stjórnandi samtakanna.

Stefán sagði sögu sína og Tinnu í Ísland í dag í kvöld. Hér má sjá þátt kvöldsins.

Stefán og aðrir fyrrverandi skjólstæðingar Hugarafls sendu félagsmálaráðuneytinu fyrir nokkrum vikum samantekt greinargerða vegna starfs- og stjórnunarhátta samtakanna og framkomu formanns gagnvart félagsmönnum. Ráðuneytið hefur fjármagnað samtökin með samningi til ársins 2022.

Í þessari samantekt eru frásagnir af einelti, útilokun, ógnarstjórnun og eitraðri framkomu stjórnanda í garð óbreyttra félagsmanna sem í daglegu máli eru kallaðir notendur í tungutaki Hugarafls. Frásagnirnar greina frá því að samtökin séu miklu frekar einskonar sértrúarsöfnuður þar sem stjórnandinn Auður Axelsdóttir og eiginmaður hennar stýra með harðri hendi, á sama tíma og samtökin gefa sig út fyrir að starfa á jafningjagrunni og valdeflingu þar sem allir félagsmenn eigi að vera jafnir gagnvart ákvarðanatöku innan félagsins.

Þar segir að margir hafi hröklast frá samtökunum vegna þessara starfshátta.

Hafna ásökunum og geta ekki tjáð sig

Forsvarsmenn Hugarafls hafna þessum ásökunum alfarið. Stjórn samtakanna segir í yfirlýsingu að hún harmi þessar ásakanir og segir að svo virðist sem þeim sé ætlað að kasta rýrð á samtökin.

Þá segir stjórnin að ekki sé hægt að svaraði ásökununum í efnisatriðum vegna þagnarskyldu og það sé þeim fyrrverandi félagsmönnum sem hafa stigið fram kunnugt. Þar að auki segir stjórnin að ekkert erindi hafi borist frá Félagsmálaráðuneytinu og þegar það gerist verði því svarað í öllum atriðum.

Forsvarsmenn boðaðir á fund á næstunni

Félagsmálaráðuneytið styrkti Hugarafl um átta milljónir króna í lok síðasta árs. Sá styrkur snýr að rekstri opins úrræðis þetta ár og það næsta. 

Ísland í dag sendi Félagsmálaráðuneytinu fyrirspurn við vinnslu þáttar kvöldsins og svör bárust skömmu fyrir útsendingu.

Þar segir að starfsmenn ráðuneytisins hafi skoðað þau gögn sem sexmenningarnir sendu og telji ábendingarnar alvarlegar. Enn sé verið að skoða málið og forsvarsmenn Hugarafls verði boðaðir á fund á næstunni. Enn fremur segir þar að þegar öll gögn málsins liggi fyrir verði lagt mat á hvort og þá hvaða áhrif málið muni hafa á frekara samstarf við Hugarafl.