Sund er hreyfing

Þórður Pétursson og fleiri íþróttafræðingar og sundkennarar skrifar 25. janúar 2022 10:30

Bentu á það sem er þér fyrir bestu. Hreyfing er þér fyrir bestu. Skólamál eru í stöðugri þróun. Ár frá ári, mánuðum til mánaða. Þær minningar sem margir foreldrar, afar og ömmur eiga af sinni skólagöngu eru margar hverjar enn við lýði en aðrar hafa þróast með tímanum eða eru ekki lengur við lýði.

Skrif Diljár Ámundardóttur Zoega í Fréttablaðinu 13. janúar vakti flesta sundkennara til umhugsunar um þekkingu Diljár og annarra í Skóla- og frístundaráði Reykjavíkurborgar á aðalnámskrá grunnskóla og á þekkingu á starfsháttum og kennslu í sundi. Grein Arnars Þórðarsonar í Fréttablaðinu 19. janúar sýndi svo fram á að ráðið býr yfir lítilli þekking á umfjöllunarefninu sundkennslu.

Margt sem Diljá Ámundardóttir Zoega benti á í sinni grein 13. janúar inniheldur mikla þversögn. Nemandi á að fá val að sleppa við sund ef hann hefur náð hæfniviðmiðum í lok 8. bekkjar. Við sem kennum sund um allt land sjáum fyrir okkur að ýmis ráð og nefndir koma til með að taka óupplýstar ákvarðanir án alls samráðs við fagfólkið sem eru kennararnir.

Kennarar búa yfir mikilli reynslu og við þróun okkar á hverju ári og flesta daga þurfum við að glíma við eitthvað nýtt. Skólamál eru í sífelldri þróun í að annast börn sem eru með misjafnar og fjölbreyttar þarfir og hefur sú þróun verið hröð upp á síðkastið. Skólastjórnendur keppast við að senda alla kennara á námskeið til að læra að takast á við nýja tíma. Starfsfólk sundlauga er upplýst og börn og fullorðnir gestir sundlauga eru farnir að nota þriðja klefann eða aðrar lausnir þar sem þær finnast. Allt með samtali og upplýsingagjöf þar sem margir koma að borðinu. Enginn kennari vill að nemanda líði illa. En við erum öll að læra og mistök eru partur af reynslu.

Diljá Ámundardóttur Zoega heldur því fram í sömu grein að tillaga sem snýr að því að nemendur klári sína sundkennslu við lok 8. bekkjar sé borðleggjandi fyrirkomulag í aðalnámskrá grunnskóla.

Við kennarar viljum aðeins vitna í aðalnámskrá grunnskóla fyrir Diljá, aðra fulltrúa í Skóla- og frístundaráði Reykjavíkurborgar, alla aðra sem eru í sams konar ráðum í öðrum bæjarfélögum ásamt öðrum sem hafa áhuga.

Efst í umfjöllun um íþróttir og sund í aðalnámskrá grunnskóla stendur:

- Hreyfing er mikilvæg öllum börnum. Sund er hreyfing - Aukin sundfærni styrkir sjálfsmynd og eykur sjálfsöryggi einstaklingsins. Sund er góð leið til heilsubótar enda er aðgengi að góðri sundaðstöðu almennt afar gott hér á landi. Hreinlæti, líkamlega umhirðu, fræðslu um kynímyndir og staðalmyndir og umræðu um einelti og annað ofbeldi er auðvelt að tengja þessari kennslu.

Sund er mikilvæg hreyfing. Við fagaðilarnir – íþróttafræðingar - sundkennarar erum best til þess fallin með okkar reynslu að fá nemendur með okkur og klára grunnskólasundkennsluna eins og hún kemur fyrir í aðalnámskrá.

-Í skólasundi skal fyrstu tvö árin leggja megináherslu á aðlögun barnsins að vatninu í gegnum leik og æfingar. Kynna almennar sundaðferðir í 1-4. bekk. Nemendur sem ljúka 4. bekk þurfa að hafa öðlast nokkra kunnáttu í sundaðferðunum og getað bjargað sér á sundi. Nemendur í 5.-7. bekk skulu fá aukna áhersla á notkun vatnsins til heilsueflingar með margvíslegum æfingum bæði á sundi og við fjölbreyttar styrkjandi æfingar í vatninu.

Við lok 10. bekkjar getur nemandi: Tekið ákvarðanir á grundvelli öryggis- og umgengnisreglna og brugðist við óvæntum aðstæðum. Framkvæmt og útskýrt helstu atriði skyndihjálpar, endurlífgunar og björgunar úr vatni og notkun björgunaráhalda. Bjargað jafningja á björgunarsundi. Á unglingastigi skal einnig auka vægi björgunarþátta svo sem þjálfun í að troða marvaða, bjarga félaga upp á flotsveig eða hring. Þá skal æfa björgunarsund með félaga.

Í stuttri samantekt þá er lagður grunnur að sundtökunum á yngsta stigi. Á miðstigi er lagt áhersla á að börnin nái að synda á milli bakka og á unglingastigi er lagt áherslu á björgun í vatni.

Að allir útskrifast úr sundi í 8. bekk er engan veginn fagleg nálgun og alls ekki í neinu samráði við þá kennara sem stunda kennslu í þessari kennslugrein vítt og breytt um landið.

Kæra Diljá, Örn og aðrir í öðrum skólanefndum. Við Íþróttafræðingar og sundkennarar erum alveg til í að samþykkja að kannski mætti gera sund að valgrein í 10. bekk. Það væri þá undir kennurum og skólastjórnendum komið. Það gæti vissulega verið hvetjandi að mæta í alla tíma í 9. bekk og ná þá að klára hæfniviðmið í 10. bekk í leiðinni. En það val í 10. bekk þarf þá að vera með hreyfingu á móti eins og stendur í aðalnámskrá. Það er nefnilega þannig að ef nemendur hafa fengið góða kennslu á yngri stigum skilar það sér í eldri deildir sem áhugaverðir tímar sem gefa heilmikið í þoli og tækni. Lausnin er síst að hætta að hreyfa sig.

Sund er hreyfing. Hreyfing er þér fyrir bestu.

Höfundar eru íþróttafræðingar og sundkennarar vítt og breitt um landið.

Ana Tepavcevic – Sundkennari Hafnarfirði

Bjarney Gunnarsdóttir - Íþróttafræðingur/sundkennari Reykjavík

Darri Sigurðsson - Íþróttafræðingur/sundkennari Hellu

Edda Linberg - Íþróttafræðingur/sundkennari Akureyri

Guðni Sighvatsson - Íþróttafræðingur/sundkennari Laugarvatni

Harpa Eyfjörð Helgadóttir – Íþróttafræðingur/sundkennari Svalbarðsströnd

Harpa Rut Heimisdóttir - Íþróttafræðingur/sundkennari Dalvík

Haukur Már Ólafsson - Íþróttafræðingur/sundkennari Kópavogi

Hrund Jónsdóttir – Íþróttafræðingur/sundkennari Seltjarnarnesi

Kjartan Ólafsson – Íþróttafræðingur/sundkennari Kópavogi