Stór­leikur Elvars dugði ekki til

Eftir hnífjafnan fyrsta leikhluta var leikurinn mjög kaflaskiptur. Heimamenn spiluðu frábærlega í öðrum leikhluta og leiddu með níu stiga mun í hálfleik, staðan þá 46-37.

Elvar Már og félagar mættu galvaskir til leiks í síðari hálfleik. Sóknarleikur þeirra blómstraði á meðan heimamenn áttu í stökustu vandræðum með að koma boltanum ofan í körfuna.

Það snerist hins vegar við í fjórða og síðasta leikhluta leiksins og fór það svo að heimamenn unnu með 12 stiga mun, lokatölur 90-78.

Elvar Már var að venju frábær í liði Risanna frá Antwerp en það dugði ekki til í kvöld. Njarðvíkingurinn knái skoraði 17 stig, gaf 7 stoðsendingar og tók 4 fráköst.