Samdi um bætur vegna handtöku í Gleðigöngunni

Elínborg var í Gleðigöngu Hinsegin daga þann 17. ágúst árið 2019 þegar hún var handtekin án þess að hafa nokkuð unnið sér til sakar. 

„Þetta kom þannig til að ég er á pride og er skreytt og er með bleikan klút og grímu,“ sagði Elínborg á sínum tíma í samtali við Vísi og bætti því við að algengt sé að fólk hylji andlit sitt með grímum eða glimmeri í Gleðigöngunni.

„Ég var að hlaupa niður Skólavörðustíg því ég var að flýta mér að hitta vini mína. Ég hélt á litlu pappaspjaldi sem á stóð „queer liberation. Svona skilti eru líka mjög algeng í göngunni.“

Hún hafi síðan gengið í flasið á fjórum lögreglumönnum sem hafi gripið í hana og bent henni á að hún væri inni á lokuðu svæði. Lögreglumennirnir hafi bent henni á að fara út af svæðinu, auk þess sem þeir hafi sagt henni að taka af sér grímuna. Loks fór svo að hún var handtekin og sett inn í lögreglubíl

Nefnd um eftirlit með lögreglu sá ekkert að handtökunni

Málið var sett í skoðun innan lögreglunnar sem óskaði eftir upptökum og vitnum að atvikinu. Þá óskaði Dóra Björt Guðjónsdóttir, formaður mannréttinda-, nýsköpunar- og lýðræðisráðs Reykjavíkurborgar eftir komu Sigríðar Bjarkar Guðjónsdóttur, lögreglustjórans á höfuðborgarsvæðinu, á fund ráðsins.

Svo fór hins vegar að nefnd um eftirlit með lögreglu komst að þeirri niðurstöðu að ekki þætti ástæða til að aðhafast frekar í málinu og að ekki lægju fyrir neinar upplýsingar um að lögreglumenn hafi beitt öðru en nauðsynlegri valdbeitingu.

„Það hljómar ekki eins og sannfærandi niðurstaða, í ljósi þess að ég fæ greiddar 220 þúsund krónur í miskabætur,“ segir Elínborg í samtali við Vísi.

Vildi ekki fara dómstólaleiðina vegna fyrri reynslu

Elínborg segir í samtali við Vísi að hún hafi  þurft að hugsa sig mjög vel um hvort hún vildi láta reyna á málið fyrir dómstólum í ljósi fyrri reynslu hennar af dómstólaleiðinni. Þó hafi hún alltaf verið viss um að málið myndi vinnast.

Í fyrra var Elínborg sakfelld fyrir brot gegn valdstjórninni og að hafa ekki farið eftir fyrirmælum lögreglu þegar hún var handtekin fyrir Alþingishúsið, annars vegar, og dómsmálaráðuneytið, hins vegar. Hún hafði verið þar í mótmælaskyni ásamt félögum sínum úr hópnum No borders Iceland, en sex þeirra voru einnig dregnir fyrir dóm í málinu.

Hún segist hafa upplifað mikla niðurlægingu þegar hún sat undir ásökunum og yfirheyrslum í dómsal og því hafi hún ákveðið leita frekar sáttar í málinu en að fara dómstólaleiðina.

Heildargreiðsla ríkisins ríflega 600 þúsund krónur

Samkomulag liggur nú fyrir í máli Elínborgar Hörpu en lögmaður hennar og lögmaður íslenska ríkissins sömdu um greiðslu 200 þúsund króna í miskabætur auk vaxta og dráttarvaxta, um fimmtán þúsund krónur. Upphaflegt boð um bætur hljóðaði upp á 75 þúsund krónur, að sögn Elínborgar.

Þá greiðir ríkið þóknun lögmanns Elínborgar upp á tæplega 400 þúsund krónur.

Því er heildarkostnaður ríkissins af handtöku Elínborgar 607 þúsund krónur, að ógleymdum kostnaði við rannsókn málsins og þóknun lögmanns.

Bæturnar renni til góðra málefna

Elínborg segir í samtali við Vísi að hún ætli að láta bótagreiðsluna renna til ýmissa verkefna sem tengjast baráttu hinsegin fólks.

Þá nefnir hún sérstaklega að hluti bótanna muni renna til nýstofnaða hópsins Lög og regla, sem fjallar um lögregluofbeldi á Íslandi og veitir þolendum þess vettvang til að koma sögum sínum á framfæri á Twitter undir myllumerkinu #logogregla.

„Sem þolandi lögregluofbeldis fagna ég þessum hóp og þessari umræðu, en það er mjög lítið talað um þetta á Íslandi og oft reynt að þagga niður eða gera lítið úr því þegar fólk segir frá,“ segir Elínborg.