Verratti biður reiða Ítala um að láta ungu landsliðsmennina í friði

Ítalir töpuðu mjög óvænt á móti Norður Makedóníu á heimavelli í umspili um laus sæti á HM 2022 og það er óhætt að segja að ítalska þjóðin hafi farið á hliðina eftir þessi miklu vonbrigði.

Ítalir urðu Evrópumeistarar síðasta sumar en hafa ekki keppt á HM síðan keppnin fór fram í Brasilíu árið 2014 þar sem þeir komust ekki upp úr sínum riðli.

Marco Verratti er einn reyndasti og virtasti leikmaður ítalska liðsins en þessi frábæri miðjumaður spilaði á síðasta heimsmeistaramóti Ítala þá aðeins 21 árs gamall. Hann verður 33 ára gamall þegar Ítalir fá næst tækifæri til að spila í úrslitakeppni HM.

Verratti þótti ástæða til að biðla til landa sinna í pistli á samfélagmiðlum eftir allt fjaðrafokið síðan áfallið kom í uppbótatíma umspilsleikinn á móti Norður Makedóníu.

Verratti þakkaði öllum landsliðshópnum fyrir og setti áherslu á það hversu mikilvægt sé að hgalda áfram baráttunni þegar mótlætið er mest.

„Þegar þú vinnur þá er auðvelt að þakka öllum. Ég vil gera það í dag eftir að við féllum úr keppni og misstum af möguleikanum að keppa í eftirsóttustu og fallegustu keppninni fyrir okkur leikmenn en ekki síst fyrir stuðningsmenn Ítalíu út um allan heim,“ skrifaði Marco Verratti.

Hann reyndi líka að útskýra fyrir svekktum Ítölum að landsliðsmennirnir væru líka manneskjur sem hafa líka þjáðst mikið síðan að ljóst varð að þeir fengju ekki að spila á HM í ár.

„Því miður er það eins með fótboltann og lífið sjálft að hlutirnir haldast oft ekki í hendur við væntingarnar. Vonbrigðin eru mikil í dag en við höfum þegar sýnt með vinnusemi, ástríðu og stóru hjarta að allt er mögulegt. Svo, hvort sem það er eftir frábæran sigur eins og síðasta sumar eða eftir súrt tap, þá verðum við að halda áfram að berjast. Fótboltinn er okkar ástríða og ég er viss um að við höldum áfram að gera allt til þess að ná árangri saman,“ skrifaði Verratti.

„Eitt í lokin: Ég tel að það sé ekki besta leiðin að svívirða alla því við gerðum allir okkar besta sem var því miður ekki nóg. Fyrst og fremst látið ungu leikmennina okkar í friði. Ef þið vilji endilega svívirða og smána einhvern gerið það við okkur eldri leikmennina. Stundum gleymum við því að við erum öll manneskjur, venjulegar manneskjur og minnstu hlutir geta haft mikil tilfinningaleg áhrif,“ skrifaði Verratti.