Lífið

„Mætti hlúa töluvert betur að minni andlegu heilsu“

Dóra Júlía Agnarsdóttir skrifar
Leikkonan og lífskúnstnerinn Aníta Briem er viðmælandi vikunnar í Innblæstrinum.
Leikkonan og lífskúnstnerinn Aníta Briem er viðmælandi vikunnar í Innblæstrinum. Saga Sig

Aníta Briem hefur verið viðriðin leiklistina frá því hún var níu ára gömul. Hún á að baki sér fjölmörg verkefni bæði hér heima og erlendis. Á undanförnum árum hefur hún verið að gera það virkilega gott á Íslandi og fór meðal annars með hlutverk í sjónvarpsseríunni Ráðherrann árið 2020, kvikmyndinni Skjálfta sem kom út fyrr á árinu og hinni ný frumsýndu Berdreymi. Nú vinnur hún að sjónvarpsseríu sem hún skrifaði. Þessi hæfileikaríka listakona elskar bækur og tónlist og segir engan dag í sínu lífi eins. Aníta Briem er viðmælandi vikunnar hjá Innblæstrinum.

Innblásturinn er fastur liður hjá Lífinu á Vísi þar sem rætt er við ólíkt fólk um hvað veitir því innblástur í tilverunni og hvaða ráðum þau luma á varðandi andlega heilsu.

Hver ert þú í þínum eigin orðum?

Æ er maður ekki bara manneskja í vinnslu? Ég er forvitin, ástríðufull um að segja sögur og um að vera góð mamma. Ástríðufull almennt.

Hvað veitir þér innblástur?

Bækur, samstarfsfólk mitt, fyrirlestrar og q&a (spurningar og svör) við áhugavert fólk, annarra manna skoðanir, vorið, myrkrið, túlípanarnir sem eru að springa út um þessa mundina í Vesturbænum..

Hvað er þitt besta ráð til að næra andlega heilsu?

Ég er kannski ekki manneskjan til að gefa það ráð. Enda mætti ég hlúa töluvert betur að minni andlegu heilsu. En ef ég mætti hér formlega gefa sjálfri mér ráð, myndi ég segja: Aníta plís reyndu að sofa meira, komast oftar í uppáhalds gym tímana þína með Ellý í Reebok og gefðu þér meiri tíma til að lesa. Held það væri mjög sterkur grundvöllur að betri líðan.

Hvernig er hefðbundinn dagur í þínu lífi?

Það er bara ekkert slíkt til. Ég hef alltaf unnið sjálfstætt og því engir dagar eins! Þessa dagana er ég hinsvegar í undirbúningi fyrir sjónvarpsseríu sem ég skrifaði svo dagarnir eru annað hvort í skrifum eða vinnu með yndislega leikstjóranum mínum henni Katrínu Björvinsdóttur. Þá tek ég daginn snemma, á ljúfa stund með dóttur minni að koma henni í skólann og reyni svo að nýta þá snerpu og orku sem heilinn hefur svona fyrripart dagsins.

Uppáhalds lag og af hverju?

Úff.. ég er algjör músikperri og elska alls konar tónlist. Fer mjög mikið eftir því verkefni sem ég er að vinna að, hvað ég hlusta á. Ég bý til playlista og nota tónlist til að setja mig í einhvern ákveðin rhythma. Akkúrat þessa dagana er ég mikið að hlusta á „Something in the way“ með Nirvana. Ég held að það bara útskýri sig sjálft.

Uppáhalds matur og af hverju?

Allir vegan réttirnir á veitingastaðnum Hósíló. Ég dýrka þann stað og að borða þar er ferðalag og upplifun.

Besta ráð sem þú hefur fengið?

ALLTAF að hlusta á innsæið. Það lýgur aldrei.

Hvað er það skemmtilegasta við lífið?

Fólkið í kringum mig.

Geðheilbrigði Lífið Heilsa

Tengdar fréttir

Aníta Briem stígur sín fyrstu skref sem hand­rits­höfundur

Aníta Briem, sem hingað til hefur verið þekkt fyrir leik sinn, hefur lokið skrifum á sjónvarpsþáttaröðinni Svo lengi við lifum. Þáttaröðin er framleidd af Glassriver í samstarfi við Stöð 2. Hún segir þáttaröðina vera óð sinn til ástarinnar.

„Maður myndi ekki kunna að meta það ef allt gengi upp“

Árni Páll Árnason er listamaður og rappari, þekktur undir listamannsnafninu Herra Hnetusmjör, og á að baki sér ótal marga smelli á borð við „Upp Til Hópa“ og „Já ég veit“. Árni er mikill fjölskyldumaður, tveggja barna faðir og nýtur lífsins edrú, eins og kemur gjarnan fram í textum hans. Árni Páll er viðmælandi vikunnar í Innblæstrinum.

„Gæti ekki verið spenntari að takast á við þau verkefni sem eru framundan“

Tónlistarkonan Elísabet Eyþórsdóttir, gjarnan kölluð Beta, kom, sá og sigraði í Söngvakeppni Sjónvarpsins í ár ásamt systrum sínum, Elínu og Sigríði. Þessi lífsglaða kona hefur starfað sem söngkona og lagahöfundur í mörg ár og segir ótrúlega skemmtilegt að fá að vinna við og kenna tónlist. Beta er viðmælandi vikunnar í Innblæstrinum.



Mest lesið


Fleiri fréttir

Sjá meira


×

Mest lesið


Tarot dagsins

Dragðu spil og sjáðu hvaða spádóm það geymir.