Í maí 2017 skrifuðu borgarstjóri, framkvæmdastjóri VSÓ og framkvæmdastjóri Vesturbugtar undir samkomulag um byggingu 176 íbúða í Vesturbugt og áttu framkvæmdir að hefjast innan fimmtán mánaða fráundirritun, eða haustið 2018. Ekkert hefur hins vega orðið að framkvæmdum.
Í viðtali við fréttastofuna hinn 17. september 2020 sagði Jónas Þór Þorvaldsson þáverandi framkvæmdastjóri byggingafélagsins Kaldalóns að verkinu hefði seinkað vegna breytinga á áformunum, meðal annars með fjölgun íbúða. Stefnt væri að því að hefja framkvæmdir vorið 2021.
„Það verða væntanlega um það bil 120 íbúðir í seinni áfanganum sem er Hlésgata 1 og 70 íbúðir austan meginn á Hlésgötu 2,“ sagði Jónas Þór. Fjallað var um málið í kvöldfréttum Stöðvar 2 í kvöld:
Ekki skorti á glæsileika áætlananna, íbúðir af öllum stærðum í fimmtán húsum þar sem borgin átti að fá um fjögur þúsund fermetra undir félagslegar íbúðir og stúdentaíbúðir.
„Ef það gengur að komast af stað með fyrsta áfangann í byrjun næsta árs (2021) þá er hann kominn 2023. Hinn gæti byrjað ári eftir að sá fyrri fer af stað. Þá er þetta búið vonandi öðru hvoru meginn við 2024-25 ef allt gengur upp,“ sagði Jónas Þór.
En það er greinilegt að allar þessar áætlanir hafa brugðist. Ekki einni skóflu verið stungið niður í Vesturbugtinni, á einni verðmætustu lóð borgarinnar, þar sem tæplega tvö hundruð íbúðir ættu að hafa risið nú þegar.
Dagur B. Eggertsson borgarstjóri segir að rekið hafi verið markvisst á eftir lóðahöfum vegna stöðunnar á húsnæðismarkaðnum.
„Það eru að mér skilst góð samtöl í gangi. En við höfum gefið aðilum tíma út næsta mánuðinn til að ganga frá öllu og fara af stað á þessu ári,“ segir borgarstjóri. Að öðrum kosti verði lóðin kölluð til baka.
„Já, þetta byggir á samningum sem gerðir voru á sínum tíma. Þeir geta ekki varað endalaust ef það er ekki farið af stað að byggja. Við erum nú í eftirrekstri hér og á nokkrum öðrum stöðum til að tryggja að eins mikið fari í gang á þessu ári og hægt er,“ segir Dagur B. Eggertsson.
