Pöruðu danshreyfingar við drykki

Blaðamaður fékk heyra í Siggu Soffíu, eins og hún kýs að vera kölluð, að forvitnast frekar um verkefnið:

Hvernig fór viðburðurinn ykkar fram á HönnunarMars?

Þetta var viðburður sem var soldið margþættur. Við buðum fólki að koma í klukkutíma upplifun þar sem líkjörinn Eldblóma Elexír og ilmurinn var kynnt. Okkur langaði að geta boðið fólki í vínsmökkun þar sem fólk gæti fengið innsýn inn í hugmyndaheim Eldblóma og segja fólki frá tengingunni milli flugelda og blóma. 

Þetta var skemmtileg blanda af fræðslu, vínsmakki og svo var matur frá Hnoss sem var paraður við drykkinn okkar hinn íslenska Spritz sem og danspörun.

Hvað er danspörun?

Ég ásamt dansara Emilie Ann og Ásu kollu DJ höfum tekið smá rannsókn á því hvaða danshreyfingar er gott að framkvæma haldandi á kampavínsglasi. 

„Við viljum meina að það að halda á glasi í kokteilboði eigi ekki að hamla þig í dansinum heldur vera innblástur.“

Svo skoðum við hvaða hreyfingar passa við rauðvín og kokteila og settum aðalfókusinn á hvaða hreyfingar parast best með kampavíni. Svona eins og matarpörun nema hreyfingar. Þar spilum við tónlist og leiðum fólk áfram í léttum danshreyfingum. 

„Mjög fyndið og skemmtilegt og enginn að taka sig mjög alvarlega, dansgleðin í fyrirrúmi.“

Afhverju vinna Eldblóm með flugelda og blóm?

Ég hef unnið við að gera flugeldasýningar í nokkur ár og áttaði mig á tengslunum milli flugelda og blóma. Árið 1585 var orðið Hanabi fyrst skráð en á japönsku þýðir Hana eldur og bi blóm svo Japanir tala um Eldblóm en ekki flugELDA. Flest allir flugeldar voru upphaflega hannaðir í mynd blóma. Flest flugelda áhrif notaðuð í dag eru í formi blóma og trjáa af asískum uppruna. 

Ég gerði verk sem hét Eldblóm, dansverk fyrir flugelda og flóru á listahátíð fyrir þremur árum. Þar „ræktaði ég flugeldasýningu“. Blómainnseting var í Hallargarðinum og drykkurinn er gerður úr þeim blómum. Eldblómin sem voru í því verki eru í drykknum og myndar grunninn bæði að líkjörnum og ilminum. Þetta er algjör sumardrykkur og kemur í búðir í sumar/haust.

Þetta er drykkur fyrir dansara og það stendur á flöskunni „smakkað og pakkað af ballerínum". Elexírinn er með háa prósentu af dansi í vökvanum og þess vegna lofum við einnig frumlegum danshreyfingum á þriðja glasi.

Hvernig var stemningin á HönnunarMars?

Við fengum ótrúlega góð viðbrögð við drykknum og ilminum sem er að seljast upp. Við vorum með sextán manna hópa, þrisvar á dag niður í Listval í Hörpu og þar fékk fólk að smakka og danskennslu. Það var virkilega gaman að hafa svona litla hópa og geta talað við alla sem komu og svarað spurningum og átt samtal. 

Við munum klárlega gera þetta aftur þegar Elexírinn er kominn í framleiðslu en það tekur langann tíma að rækta blómin sem mynda grunninn í drykknum. Hægt er að sjá allt um verkefnið heimsíðunni okkar og þar er hægt að senda fyrirspurnir vilji fólk fá kynninguna í einkapartý.