„Væri gaman að vinna hann einu sinni“

Liverpool spilaði um Samfélagsskjöldinn 2019 og 2020 en tapaði í bæði skipti eftir vítaspyrnukeppni. Í fyrri leiknum fyrir Manchester City og þeim síðari fyrir Arsenal.

„Leikurinn er mjög mikilvægur vegna þess að við höfum spilað þennan úrslitaleik tvisvar sinnum og það væri gaman að vinna hann einu sinni. Þetta er síðasti enski bikarinn fyrir okkur til að strika af listanum. Svo við munum gera okkar besta, að sjálfsögðu,“ sagði Klopp á blaðamannafundi fyrir leik.

Leikurinn er árlegt uppgjör Englandsmeistara og bikarmeistara en Liverpool vann bæði FA-bikarinn og deildabikarinn á síðustu leiktíð. Liðið þurfti hins vegar að sjá eftir enska meistaratitlinum í hendur Manchester City á lokadegi deildarinnar.

Aðspurður um hversu langan tíma það hafi tekið hann að jafna sig á þeim vonbrigðum segir Klopp:

„Það tók mig bara einn dag, því daginn eftir var skrúðganga um borgina, og ég sætti mig við það allt saman vegna þess að við vissum að titilbaráttan var jöfn, við vissum að það voru augnablik af óheppni sem skiptu sköpum. En þetta eru íþróttir og við föllumst á reglurnar. Eitt aukastig í 38 leikjum og eitt mark á 90 mínútum er oft nóg til að hafa áhrif. Við sættum okkur við það. Svo það tók mig ekki langan tíma.“

Leikur Liverpool og Manchester City hefst klukkan 16:00 en bein útsending og upphitun fyrir leikinn fer af stað klukkan 15:40 á Stöð 2 Sport 2.