KSÍ veitir áfengi ef vel fer í kvöld

Íslandi dugar jafntefli gegn Hollandi í Utrecht í kvöld til að tryggja sér sæti á HM. Það yrðu afar merk tímamót í sögu íslenskrar knattspyrnu. Tapi liðið þarf það að fara í umspil í október.

Leikurinn í kvöld er síðasti leikur Íslands í undankeppni HM og það hefur tíðkast í gegnum tíðina að skálað sé í áfengum drykkjum þegar undankeppnum lýkur. 

Vinnuregla samþykkt síðasta haust

Vanda Sigurgeirsdóttir, formaður KSÍ, segir að samkvæmt vinnureglu sem stjórn KSÍ samþykkti síðastliðið haust sé áfengi nú almennt ekki veitt í keppnisferðum en á því sé gerð undanþága þegar frábær, íþróttalegur árangur náist. Sæti á HM fellur hiklaust undir þá skilgreiningu.

Vanda segir þó að komi til þess þá verði áfengi aðeins veitt í hóflegu magni og að sjálfsögðu aðeins þeim sem hafi aldur til.

Það að drukkið sé áfengi í landsliðsferðum hefur dregið mikinn dilk á eftir sér á síðustu misserum því tveir landsliðsþjálfarar hafa orðið að víkja í kjölfar áfengisneyslu í landsliðsferðum. Það eru Eiður Smári Guðjohnsen, fyrrverandi aðstoðarlandsliðsþjálfari karla, og forveri núverandi landsliðsþjálfara kvenna, Jón Þór Hauksson.

Jón Þór hætti eftir að hafa farið yfir strikið í samræðum við leikmenn kvennalandsliðsins undir lok árs 2020, þegar liðið fagnaði því í Ungverjalandi að hafa tryggt sig inn á Evrópumótið sem fram fór í Englandi í sumar.

„Eftir sigurinn á Ungverjalandi var EM-sætinu fagnað af liðinu, starfsmönnum og fulltrúum KSÍ. Við þetta tilefni var boðið upp á áfengi,“ sagði Jón Þór meðal annars eftir að hann hætti, og bætti við:

„Ég hef alltaf lagt áherslu á að koma hreint og beint fram við þá leikmenn sem ég hef þjálfað, að hrósa og gagnrýna með það að markmiði að hjálpa þeim að gera enn betur og styrkja þannig liðið. Slík samtöl eiga hins vegar ekki heima í fögnuði sem þessum og alls ekki undir áhrifum áfengis. Þarna brást ég sem þjálfari liðsins og hefði ekki átt að ræða frammistöðu og þjálfun einstakra leikmanna undir þessum kringumstæðum. Það voru mistök sem ég tek fulla ábyrgð á og hef beðið liðið og einstaka leikmenn afsökunar.“

KSÍ bauð einnig upp á áfengi í nóvember síðastliðnum, kvöldið sem leiddi til þess að Eiður Smári hætti störfum fyrir sambandið.

Sjálf neytir Vanda ekki áfengis en það kemur að sjálfsögðu ekki í veg fyrir að hún muni fagna HM-sæti vel og innilega í kvöld, náist sá merkilegi áfangi í sögu íslensks íþróttalífs:

„Spennan magnast, ég get viðurkennt það,“ sagði Vanda í samtali við Vísi í Utrecht í gær, full tilhlökkunar. Leikurinn hefst klukkan 20:45 að staðartíma, eða klukkan 18:45 að íslenskum tíma, og Vanda er vongóð um að geta í kjölfarið fagnað sennilega stærsta áfanga í sögu íslenska kvennalandsliðsins:

„Mér finnst þessi spurning svo góð; Hvað ætlum við að gera klukkan ellefu [í kvöld]? Og hvað erum við tilbúin að leggja á okkur til að gera það sem okkur langar til að gera? Ég hef fulla trú á að stelpurnar gefi sig allar í þetta. Auðvitað eru fiðrildi [í maganum] og það er líka gott. Mér finnst þjálfarateymið og stelpurnar sjálfar góðar í að finna spennustigið, og við verðum betri og betri í því,“ sagði Vanda

Ísland mætir Hollandi í Utrecht í kvöld í úrslitaleik um öruggt sæti á HM. Tapi Ísland fer liðið í umspil í október. Vísir er á staðnum og flytur fréttir í allan dag af stelpunum okkar.