Fótbolti

Berlusconi sagði Stroppa að stoppa

Sindri Sverrisson skrifar
Giovanni Stroppa hefur verið rekinn aðeins nokkrum mánuðum eftir að hafa stýrt Monza upp í efstu deild í fyrsta sinn í sögunni.
Giovanni Stroppa hefur verið rekinn aðeins nokkrum mánuðum eftir að hafa stýrt Monza upp í efstu deild í fyrsta sinn í sögunni. Getty/Marco Luzzani

Silvio Berlusconi, fyrrverandi forsætisráðherra Ítalíu og nú eigandi knattspyrnufélagsins Monza, var ekki lengi að missa þolinmæðina og rak Giovanni Stroppa úr starfi þjálfara liðsins, þó að tímabilið í ítölsku A-deildinni sé svo til nýhafið.

Hinn 54 ára gamli Stroppa skráði sig í sögubækurnar með því að koma Monza í fyrsta sinn upp í efstu deild síðastliðið vor, í gegnum umspil.

Stroppa fékk hins vegar aðeins að reyna sig í sex leikjum í ítölsku A-deildinni áður en hann var rekinn. Monza fékk aðeins eitt stig úr þessum leikjum, í 1-1 jafnteflinu við aðra nýliða, Lecce, á sunnudaginn.

Raffaele Palladino, þjálfari unglingaliðs Monza, tekur við af Stroppa en samkvæmt ítölskum miðlum er það aðeins tímabundið þangað til að Berlusconi finnur nýjan þjálfara. Palladino stýrir Monza þó að minnsta kosti gegn sínu gamla liði Juventus á sunnudaginn.

Berlusconi eignaðist Monza árið 2018 þegar liðið var í C-deild. Hann átti áður AC Milan í þrjá áratugi en seldi félagið árið 2017.

Stroppa er annar þjálfarinn sem látinn er axla skinn sín í ítölsku A-deildinni þó að tímabilið sé nýlega hafið. Bologna rak Sinisa Mihajlovic í síðustu viku og réði Thiago Motta í hans stað.

Ítalski boltinn, Serie A, er á Stöð 2 Sport en upplýsingar um útsendingar má finna hér. Serie A er hluti af Stöð 2 Sport erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.

Ítalski boltinn Fótbolti

Mest lesið


Fleiri fréttir

Sjá meira


×

Mest lesið