„Nafn mitt kom fram í tengslum við fólk sem átti að drepa“

RÚV hefur heimildir fyrir því að Helgi Hrafn hafi verið boðaður í viðtal og Smári staðfestir í samtali við miðilinn að hann hafi einnig verið boðaður. Björn Leví staðfestir í samtali við fréttastofu að hann hafi á miðvikudag í síðustu viku verið boðaður í skýrslutöku til að lesa skilaboð sem tveir menn, sem nú sæta gæsluvarðhaldi vegna málsins, sendu sín á milli.

„Þar sem mér voru sýnd samskipti milli tveggja aðila þar sem nafn mitt kom fram í tengslum við fólk sem átti að drepa,“ segir Björn Leví í samtali við fréttastofu. Hann bætir við að spjall mannanna hafi verið „samfélagsmiðlalegt“ og að hann hafi ekki skynjað mikla alvöru á bakvið ummælin. Af lestri skilaboðanna að dæma hafi þeir frekar haft ummælin í flimtingum.

Björn Leví útskýrir að tilefni spjalls mannanna tveggja hafi verið ljósmynd meðal annars af manni úti í búð sem þeir hafi talið að væri af Birni sem var síðan ekki raunin.

„Þeir virtust ekki einu sinni þekkja fólkið sem þeir töluðu um í sjón, sem er alveg merkilegt út af fyrir sig. Alvarleikinn í kringum það var kannski ekki eins mikill og maður myndi kannski halda. Maður getur í það minnsta ekki tekið þetta eins alvarlega þegar þeir vita ekki einu sinni hver er hvað. Þetta voru svona almennari ummæli, það er allavega tilfinningin sem maður fékk en að sjálfsögðu slær þetta mann.“

Alvarleikinn blasi við þegar ummæli sem þessi séu látin falla af mönnum sem hafi verið að sanka að sér skotvopnum.

„Auðvitað hefur þetta áhrif á mann og það er mjög slæmt þegar maður reynir að telja sér trú um að maður sé að standa fyrir einmitt mannréttindum og borgararéttinum og að hjálpa til við það að allir hafi það gott og hafi ofan í sig og á. Maður reynir að vera hugrakkur og standa gegn ofríki og rasisma þá er lausnin að hóta manni ofbeldi? Þá er erfiðara að vera hugrakkur.“

Björn Leví segir að við sem samfélag þurfum nú að hugsa um leiðir til að fyrirbyggja að svona nokkuð geti gerst og að passa upp á að skilja engan eftir í samfélaginu. Nú þurfi að spyrja mikilvægra spurninga.

„Hvers vegna fólk leiðist út í ofbeldi sem svar við einhverju? Það er aldrei eitthvað sem á að vera valmöguleiki. Við verðum að svara því og mennta okkur. Um leið og við erum farin að hugsa um ofbeldi sem einhvers konar lausn við einhverju sem við skynjum sem vandamál, þá er það vandamálið og þá þurfum við að leita okkur hjálpar.“

Landsréttur stytti í hádeginu í dag tveggja vikna gæsluvarðhald yfir báðum mönnunum og úrskurðaði um eins vikna varðhald og einangrun.