Uppbygging hafin á fjölbreyttri byggð á Heklureit

Heklureiturinn sem afmarkast af Nóatúni, Laugarvegi og Brautarholti er mjög stórt byggingarsvæði. Bílaumboðið Hekla hefur verið þar með starfsemi í marga áratugi í nokkrum stórum húsum eða húsalengjum. Á allra næstu árum fer þessi 12.800 fermetra lóð undir íbúðabygð.

Örn Kjartansson framkvæmdastjóri Heklureitsins segir að fimm sjö til tveggja hæða fjölbýlishús með inngarði í miðjunni eigi að rísa á lóðinni.

Það er byrjað að rífa niður húsin á Heklureitnum og innan örfárra mánaða verða byggingarnar meira og minna horfnar. Gjörbreyting verður á reitnum en þar munu rísa 440 fjölbreyttar íbúðir og þjónustustarfsemi verður á jarðhæðum við Laugarveginn.

„Við verðum örugglega að rífa hérna út árið. Þá getum við vonandi byrjað á jarðvinnu fljótlega í janúar. Við erum að byrja á fyrstu tveimur húsunum á Heklureitnum. Hérna á horninu verður hús með 82 íbúðir og næsta við hliðina er 102 íbúðir. Þannig að þetta eru rúmlega 180 íbúðir sem koma í þessum fyrsta áfanga má segja,“ segir Örn.

Samkvæmt deiliskipulagi megi hins vegar byggja 440 íbúðir á reitnum sem gert verði í áföngum. Hekla verði einhver nokkur ár í viðbót í húsi austast á lóðinni.

„Fyrsta húsið ætti að vera risið 2025 eða hugsanlega fyrstu íbúar að flytja inn á Heklureitinn og svo koll af kolli.”

Og þetta eru alls konar íbúðir samkvæmt uppskrift borgarinnar með blöndun byggðar?

„Já, það má segja. Það er bæði auðvitað gert ráð fyrir hluta fyrir leiguíbúðir. Svo eru þetta margar stærðir af íbúðum. Allt frá 48 fermetra stúdeo íbúðum upp í kannski 130 til 140 fermetra íbúðir á tveimur hæðum,“ segir Örn.

Þá verður þjónusta og verslun á jarðhæðum húsanna við Laugarveg. Eins verði Brautarholtið tekið í gegn og göngás lagður milli húsanna.

„Þetta er held ég einn af þessum þéttingarreitum sem allir geta verið sammála um að eigi skilið að ganga í endurnýjun lífdaga,“ segir framkvæmdastjórinn þar sem við virðum fyrir okkur niðurrifið.

Undir húsunum verður tvöfaldur bílakjallari með um 350 stæðum. Kjallarinn rúmar ekki bíla fyrir alla íbúa en borgarlínan mun einnig liggja steinsnar frá húsunum við Laugarveg.

„Já, heldur betur. Það er gert ráð fyrir að borgarlínan taki hluta af lóðinni til að koma borgarlínu akbrautinni þarna á milli fyrir neðan. Ég held bara að öll holtin séu að breytast. Við sjáum til dæmis nýbyggingu hérna við hliðina, númer tuttugu," segir Örn Kjartansson og bendir á íbúðarhús sem áður hýsti skemmtistaðinn Þórskaffi.