Fann föður sinn og nauðgara móður sinnar með DNA prófi

Magdalena Cruz fæddist árið 1986 en þá var móðir hennar vistuð á þjónustumiðstöð fyrir fatlaða í Rochester í New York. Hún var þrítug en með þroska tveggja ára barns en þar að auki gat hún ekki tjáð sig, notaði bleyjur og þurfti stanslausa umönnun þegar í ljós kom að hún var ólétt.

Forsvarsmenn miðstöðvarinnar sögðu fjölskyldu hennar að líklegast væri einhver maður sem vistaður væri á stofnuninni sekur um að hafa nauðgað konunni og hétu því að málið yrði rannsakað af bæði lögreglu og þeim sjálfum.

Notaði Ancestry.com

Nærri því fjórum áratugum síðar hefur Cruz sýnt fram á hver faðir hennar er en það gerði hún með því að taka DNA-próf og senda niðurstöðurnar í vinsælan gagnagrunn vestanhafs sem fólk getur notað til að fá upplýsingar um uppruna sinn.

Maðurinn sem um ræðir var ekki vistaður á stofnuninni, heldur vann hann þar. 

Ekki er hægt að ákæra föður hennar, þar sem brot hans er fyrnt samkvæmt lögum, en Cruz hefur þess í stað höfðað mál gegn opinberu stofnuninni sem rekur umrædda þjónustumiðstöð og aðrar í New York ríki. Það gerði hún á grundvelli laga sem samþykkt voru í fyrra en þau snúa að því að hægt sé að höfða mál vegna gamalla kynferðisbrota.

Sár fundust á móðurinni

Lögmaður Cruz sagði blaðamanni AP að hún hefði byrjað rannsókn sína fyrir um fjórum árum. Hún byrjaði á því að verða sér út um gögn varðandi umönnun móður hennar. Þar var meðal annars skrifað um meiðsli sem hún hlaut fyrir og eftir að hún varð ólétt.

Bitfar fannst á brjósti hennar, marblettir á öxlum og stórt sár á baki.

„Líkar við litaða menn, klæðir sig úr fötunum, öskrar stundum, hoppar og borðar mjög hratt,“ skrifaði einn af starfsmönnum þjónustumiðstöðvarinnar um móður Cruz en hún telur að sá sé faðir hennar.

Töluðu aldrei við lögreglu

AP fréttaveitan segir Cruz hafa komist að því að forsvarsmenn stofnunarinnar kölluðu lögreglu aldrei til og ræddu þar að auki aldrei við starfsmenn um málið á sínum tíma.

Í gögnunum kom þar að auki fram að í stað þess að rannsaka málið lögðu forsvarsmenn þjónustumiðstöðvarinnar til að konan yrði sett á getnaðarvarnir. Ekki liggur fyrir hvort það hafi verið gert en lögmenn Cruz segja að slíkt hefði engum tilgangi þjónað nema til að hylma yfir áframhaldandi brot gegn konunni.

Þeir segja enn fremur að líklega verði aldrei hægt að vita hve oft konunni hafi verið nauðgað og hvort brotið hafi verið á öðru vistfólki, vegna þess að forsvarsmenn þjónustumiðstöðvarinnar hafi falið brotin.

Fann föður sinn á netinu

Cruz fór í greiningu á Ancestry.com og fann í gegnum erfðamengi hennar að hún ætti skyldmenni í Virginíu, sem hefðu einnig farið í greiningu fyrir gagnagrunninn. Cruz fann fjölskylduna á netinu og fann þar myndir af stúlku sem hún taldi líkjast sér.

Því næst komst hún að því að faðir þessarar stúlku hefði búið í Rochester, skammt frá þjónustumiðstöðinni, á þeim tíma þegar móðir hennar var nauðgað.

Árið 2019 leitaði Cruz til lögreglunnar með þau gögn sem hún hafði safnað en rannsakendur staðfestu fljótt að maðurinn hefði unnið á þjónustumiðstöðinni á umræddum tíma. Svo langur tími væri hins vegar liðinn að ekki væri hægt að ákæra hann.

Blaðamenn AP reyndu að hafa samband við hann, án árangurs.

Í frétt AP segir að minnst tíu starfsmenn þjónustumiðstöðvarinnar á árunum 1976 til 1985 hafi reynst barnaníðingar og nauðgarar og þar á meðal væru yfirmenn, öryggisverðir og sjálfboðaliðar. Þá hafi vistfólk dáið við dularfullar kringumstæður.