Að staðartíma fór lestin af sporinu um klukkan eitt að nóttu til. NBC hefur eftir yfirvöldum að um tuttugu og tveir vagnar lestarinnar hafi farið af sporinu. Fjórtán vagnar eru sagðir hafa borið etanól.
Hús í tæplega kílómetra fjarlægð voru rýmd en engin slys á fólki hafa verið tilkynnt. Þá er ástæða þess að lestin fór af sporinu til rannsóknar.
Staða lestakerfis Bandaríkjanna hefur verið mikið milli tannanna á fólki vestanhafs eftir að lest sem notuð var til að flytja mikið magn eiturefna fór af sporinu nærri Austur-Palestínu í Ohio. Rýma þurfti um helming þess bæjar þegar kveikt var í eiturefnunum.
Íbúar Austur-Palestínu hafa miklar áhyggjur af stöðu mála þar eftir slysið og óttast að eiturefni hafi borist í jarðveg, drykkjarvatn og fleira.
