„Hún var rangt barn, á röngum stað á röngum tíma“

Fjögur ungmenni eru laus úr einangrun en sæta gæsluvarðhaldi í tengslum við rannsókn lögreglunnar á höfuðborgarsvæðinu á manndrápi á 27 ára pólskum karlmanni á bílastæði við Fjarðarkaup í Hafnarfirði fimmtudagskvöldið 20. apríl.

Vilhjálmur H. Vilhjálmsson er verjandi stúlkunnar sem var handtekin að morgni föstudags. Hún var ásamt þremur ungum strákum úrskurðuð í gæsluvarðhald og einangrun á föstudagskvöld. Hún er nú laus úr einangrun en sætir enn gæsluvarðhaldi. Vilhjálmur furðar sig á því. Stúlkan sé aðeins barn sem hafi verið á röngum tíma og á röngum stað. 

Vilhjálmur segir fráleitt að lykilvitni ákæruvaldsins sem tók upp myndbönd af atburðarásinni sem séu „lykilsönnungargögng“ og hafi í raun upplýst málið fyrir lögreglu sæti gæsluvarðhaldi sem sakborningur. Einnig skorar hann á sóknaraðila að leggja myndböndin sem stúlkan tók fram í Landsrétti og skorar á Landsrétt að horfa á myndböndin.

Kærandi sé vitni en ekki gerandi

Í kæru hans á gæsluvarðhaldsúrskurðinum til Landsréttar áréttar Vilhjálmur að stúlkan sé barn.

„Kærandi er barn. Hún er vitni í málinu, ekki gerandi, eins og framburður hennar og sýnileg sönnunargögn sanna. Hún snerti aldrei brotaþola. Hún kom aldrei nær hinni hörmulegu atburðarás en 5-8 metra. Hún veitti ekki liðsinni með hvatningu,“ segir Vilhjálmur í kæru sinni.

„Hún tók atvikið upp á myndband af því að foreldrar hennar höfðu sagt henni að gera það við ótryggar aðstæður. Hún upplýsti lögreglu strax um myndbandið, framvísaði því og heimilaði lögreglu að skoða símann sinn. Hún hefur í einu og öllu sagt satt og rétt frá hjá lögreglu og dregið ekkert undan og leitast þannig við að hjálpa lögreglu að upplýsa málið.“

Lögregla hafi rætt við hana á vettvangi glæpsins í Hafnarfirði og svo skutlað henni heim.

„Það var ekki fyrr en að það kom í ljós að brotaþoli var látinn sem kærandi var handtekinn vegna alvarleika málsins. Það er skiljanlegt til þess að tryggja fyrsta framburð og svo lögreglan gæti náð yfirsýn yfir atvik málsins. Nú hefur það verið gert. Lögreglan veit að brotaþoli er saklaus og ber ekki á nokkurn hátt ábyrgð á andláti brotaþola.“

Börn eigi ekki að sæta gæsluvarðhaldi

Vilhjálmur hefur hvatt lögreglu til að láta stúlkuna lausa úr varðhaldi.

„Hún var rangt barn, á röngum stað á röngum tíma. Það er ekki glæpur. Kærandi er þolandi í þessu máli en ekki gerandi því börn eiga ekki að þurfa að upplifa hluti sem brotaþoli hefur þurft að upplifa síðustu 3 sólarhringa. Börn eiga ekki að sæta gæsluvarðhaldi og einangrun án þess að það sé algjörlega nauðsynlegt og skipti sköpum fyrir rannsókn lögreglu. Svo er ekki tilviki kæranda enda sanna sýnileg sönnunargögn sem lögreglan er með undir höndum sakleysi hennar. Því ber að fella hinn kærða úrskurð úr gildi, láta kæranda lausa og leyfa henni að fara heim til foreldra sinna þar sem hún á heima.“

Vilhjálmur kærði gæsluvarðhaldsúrskurðinn til Landsréttar í gær. Hann vonast til að rétturinn taki kæruna fyrir á morgun en hvetur lögreglu til að sleppa stúlkunni hið fyrsta.

Rannsókninni miði vel áfram

Í tilkynningu frá lögreglunni á höfuðborgarsvæðinu sem var send út klukkan fimm í eftirmiðdaginn í dag segir að rannsókn lögreglunnar á andláti karlmanns á þrítugsaldri í Hafnarfirði í síðustu viku miði vel áfram. 

Þar segir að yfirheyrslur hafi staðið yfir undanfarna daga og að einangrun fjórmenninganna hafi verið aflétt að því loknu. Þá telur lögreglan sig hafa nokkuð skýra mynd af atburðarásinni sem leiddi til dauða mannsins.

Loks segir að vegna umfjöllunar og umræðu um andlátið vilji lögreglan taka fram að hingað til hafi ekkert komið fram við rannsókn hennar sem bendi til þess að þjóðerni hins látna hafi haft með málið að gera. Þá sé ekki hægt að veita frekari upplýsingar að svo stöddu.