Liðin tvö eru í harðri baráttu um danska meistaratitilinn og því má líta á undanúrslitaleikina sem hálfgerða úrslitaviðureign þar sem bæði lið eru talin töluvert sterkari en Silkeborg og Álaborg sem eru einnig í undanúrslitum.
Heimamenn í Nordsjælland komust yfir snemma leiks í dag og var staðan 1-0 þeim í vil í hálfleik. Ísak Bergmann nældi sér í gult spjald skömmu fyrir lok fyrri hálfleiks. Í síðari hálfleik gerði FCK breytingar til að jafna leikinn og var Ísak Bergmann tekinn af velli á 57. mínútu.
Diogo Gonçalves jafnaði metin á 65. mínútu og lagði svo upp á Jordan Larsson sem kom FCK yfir sjö mínútum síðar. Heimaliðið lét það ekki á sig fá og jafnaði metin þegar stundarfjórðungur var til leiksloka. Það var svo á síðustu mínútu venjulegs leiktíma sem heimaliðið fékk vítaspyrnu.
Emiliano Marcondes fór á punktinn og sá til þess að Nordsjælland er með eins marks forystu fyrir síðari undanúrslitaleikinn sem fram fer 4. maí næstkomandi.
