Facebook-síða Maradona hökkuð: „Þið vitið að ég sviðsetti dauða minn“

Maradona er af flestum talinn einn allra besti knattspyrnumaður sögunnar, en hann lést árið 2020, sextugur að aldri.

Þrátt fyrir andlát þessa dáða knattspyrnumanns er Facebook-síða hans enn virk og hún aðallega notuð til að deila minningum og hvatningarorðum til argentínska landsliðsins og annarra liða sem Maradona lék með á sínum leikmannaferli.

Nú hefur hins vegar einhver tekið upp á því að ráðast inn á síðuna og deila þar vægast sagt furðulegum færslum. Fyrr í kvöld birtist þar færsla þar sem Maradona virðist spyrja fylgendur sína hvort þeir viti af því að dauði hans hafi verið sviðsettur.

Þá hafa einnig birst nokkrar færslur þar sem þessi óprúttni aðili deilir Twitter-færslum frá aðgöngum sem eru ansi langt frá því að tengjast knattspyrnuferli Maradona.