„Hér verður ekki flugvöllur og hér verða ekki blokkir“

„Við friðlýsum hér í þágu mannlífs, minja og náttúru. Bessastaðanes er mikið flæmi og fólk hefur notið þess að ganga hér um, hlaupa, hjóla og fara í útreiðartúra og við viljum tryggja að komandi kynslóðir geti notið þessara landgæða hér. Þar fyrir utan sem er ekki síður mikilvægt er hér fjölskrúðugt fuglalíf og við viljum jafnframt tryggja að sú verði raunin áfram,“ segir Guðni Th. Jóhannesson. 

Unnið hafi verið að endurheimt votlendis á Bessastaðanesi. „Þannig að þegar margæsin kemur til Íslands á vorin þá finni hún áfram öruggan dvalarstað og aftur á haustin þegar hún flýgur hingað að norðan.“

Enginn flugvöllur

Guðni segir mannfólk vissulega hafa sett mikinn svip á umhverfi og náttúru við Bessastaði. Friðlýsingin sé gerð til að hægt sé að búa í eins mikilli sátt við náttúru og mögulegt er. „Hér verður ekki flugvöllur og hér verða ekki blokkir og hér verður allt með að mestu þeim brag sem nú er raunin,“ segir Guðni. Um miðbik síðustu aldar hafi fýsileiki innanlandsflugvallar á Bessastaðanesi verið skoðaður. „Bessastaðanes er svo gott útivistarsvæði að það hefði verið mikil synd finnst mér ef önnur sjónarmið en sjónarmið náttúruverndar og útivistar hefðu fengið að ráða,“ segir Guðni sem sjálfur nýtir svæðið til útihlaupa með góðum hópi.

Guðni segist ekki eiga von á að friðlýsingin hafi áhrif á útivistarsvæðið. „Það sem við þurfum til að njóta þessarar náttúru er að hún sé til staðar. Friðlýsingin er alls ekki gerð til þess að við setjum þetta svæði einhvern veginn girt af og ósnortið, alls ekki, við viljum að fólk nýti þessa náttúruperlu,“ segir Guðni glaður í bragði. 

Mikill gleðidagur

Guðlaugur Þór Þórðarson umhverfisráðherra undirritaði friðlýsinguna við Bessastaðatjörn í morgun. „Þetta er mikill gleðidagur og það er mjög mikilvægt að við hugum líka að náttúruverndinni og umhverfismálum í þéttbýlinu,“ segir Guðlaugur Þór. „Hér er mikið líf og hér er mikil náttúra og hér er búsvæði fugla og hér er ósnortin strandlengja. Nokkuð sem við eigum lítið af og það er algjörlega til fyrirmyndar að forsetaembættið og bæjarstjórn gangi í það verkefni að sjá til þess að við getum áfram notið þessa sem útivistarsvæðis en það sem er enn þá mikilvægara er að það dýralíf sem hér er að það þurfi ekki frá að hverfa og ég vona að önnur sveitarfélög á höfuðborgarsvæðinu taki sér þetta til fyrirmyndar,“ segir hann.

Bessastaðanes sé fullt af menningar- og náttúruminjum sem passa þurfi upp á. Aðspurður hvort verið sé að skoða fleiri svæði innan höfuðborgarsvæðisins til að friðlýsa svarar Guðlaugur Þór játandi. „Það er ekkert leyndarmál, að við viljum sjá strandlengjuna á höfuðborgarsvæðinu, sérstaklega við Skerjafjörðinn, verðum að líta til þess að hún verði friðlýst og ég vona að borgaryfirvöld sjái að sér og fari ekki fram með þeim hætti eins og þeir ætla. Það er sömuleiðis áhugi í öðrum sveitarfélögunum og hér hafa verið stigin mjög metnaðarfull markmið sem verða okkur öllum til heilla,“ segir Guðlaugur.

Gríðarleg þýðing

Sigrún Ágústsdóttir, forstjóri Umhverfisstofnunar, segir friðlýsinguna hafa gríðarlega þýðingu fyrir líffræðilega fjölbreytni. „Líffræðileg fjölbreytni er dauðans alvara og hefur verið lögð þung áhersla af náttúruverndaryfirvöldum núna á líffræðilega fjölbreytni. Svæðið hefur líka gríðarlega þýðingu fyrir fræðslu það býr gríðarlega margt fólk á höfuðborgarsvæðinu og það er ótrúlega mörg svæði hér sem eru bæði tækifæri til að njóta og til að fræðast. Þetta er mikilvægur staður fyrir margæsina, hún þarf að hafa sínar stoppistöðvar og ég bara hvet fólk til þess að njóta til framtíðar,“ segir Sigrún. Friðlýsing Bessastaðaness hafi verið á teikniborðinu frá 2004 í tengslum við Skerjafjarðarsvæðið.