Varla komin aftur eftir að hafa flúið gosið fyrir tveimur árum

Þegar hraunið úr Geldingadalagosinu fyrir tveimur árum stefndi niður Nátthaga var því spáð að það gæti náð Suðurstrandarvegi innan tveggja vikna, sem þýddi að Ísólfsskáli væri í hættu. Jörðin er í eigu afkomenda síðustu bændanna, en í frétt Stöðvar 2 voru rifjaðar upp myndir sem við sýndum fyrir tveimur árum þegar þau Halldór Ármannsson og Stefanía Haraldsdóttir voru að bera lausamuni úr einum bústaðnum.

„Já, það virðist allt stefna í að þetta komi hérna niður, bara á næstu einni eða tveimur vikum, segja þeir,“ sagði Halldór í viðtali á Stöð 2 í júní 2021.

Þegar við renndum núna aftur í hlað á Ísólfsskála hittum við á Ársæl, bróður Halldórs, sem rifjaði upp flóttann fyrir tveimur árum.

„Það var bara gert ráð fyrir því að það færi hér allt undir hraun og það var bara um að gera að taka saman dótið og eigur, og það sem eigulegt var náttúrlega, og yfirgefa svæðið,“ segir Ársæll Ármannsson, einn af eigendum Ísólfsskála.

Og núna í sumar var komið að því að flytja inn aftur.

„Bara örstutt síðan við fórum að gera eitthvað meira hérna. Og þá byrjar jörðin að skakast,“ segir Ársæll.

Og svo færði Halldór bróðir hans honum ný tíðindi í fyrradag.

„Þá hringir hann í mig: Heyrðu, það er byrjað að gjósa.“

-Og það er svona um það leyti sem þið eru að koma ykkur fyrir aftur, þá kemur gosið aftur?

„Já, já.“

-En ætlið þið nokkuð að hætta við?

„Nei, en við áttum von á því að það myndi gjósa en við vissum náttúrlega ekkert hvar. Hvort það væri hérna aftur eða nær Vogum eða Reykjanesbraut. Þeir ætluðu nú að fara að byggja flugvöll þarna, var það ekki?“

Ársæll vonast til að nýjasta gosið ógni ekki Ísólfsskála.

„Þetta er nú hinumegin við fjallahryggina hérna. Ég held ekki.“

-Þannig að þið munuð bara koma ykkur aftur fyrir og hafa það notalegt á Ísólfsskála?

„Já, já.

Og segist taka nýja gosinu með jafnaðargeði.

„Það þýðir ekkert annað. Við ráðum ekki yfir náttúrunni,“ segir Ársæll Ármannsson.

Hér má sjá frétt Stöðvar 2 fyrir tveimur árum: