Sísí Lára skiptir yfir til ÍBV þrátt fyrir að skórnir séu farnir upp í hillu

Hin 29 ára gamla Sísí Lára er þaulreyndur leikmaður sem var aðeins 15 ára gömul þegar hún spilaði sinn fyrsta leik fyrir ÍBV. Alls hefur hún spilað 167 leiki í efstu deild með Eyjakonum, Val og FH. Þá hefur hún spilað 20 A-landsleiki sem og hún lék með Lilleström í Noregi árið 2018.

Hún hjálpaði FH að komast upp úr Lengjudeildinni á síðustu leiktíð en ákvað í kjölfarið að leggja skóna á hilluna vegna liðagigtarinnar.

Fótbolti.net vakti upphaflega athygli á þessu en samkvæmt heimildum miðilsins er ekki víst að Sísí Lára spili með uppeldisfélaginu sem er um þessar mundir í harðri fallbaráttu í Bestu deild kvenna í knattspyrnu.

ÍBV er í 8. sæti Bestu deildar kvenna, aðeins markatölu frá fallsæti, þegar þrjár umferðir eru eftir af hefðbundinni deildarkeppni.