Skemmdu herskip og kafbát með stýriflaugum

Úkraínumenn eru sagðir sagðir hafa á sama tíma reynt að granda herskipi á Svartahafi með fjarstýrðum neðansjávarsjálfsprengidrónum.

Varnarmálaráðuneyti Rússlands segir að tíu stýriflaugum hafi verið skotið að Sevastopol og að sjö þeirra hafi verið skotnar niður. Þá segja forsvarsmenn ráðuneytisins að herskipið Vasily Bykov hafi grandað þremur drónabátum en frásögn ráðuneytisins hefur ekki verið staðfest.

Eins og fram kemur í frétt New York Times er sjaldgæft að ráðuneytið viðurkenni vel heppnaðar árásir sem þessar en íbúar borgarinnar birtu fjölmörg myndbönd af sprengingunum og eldinum sem kviknaði í Sevmorzavod-slippnum.

Í árásinni skemmdist herskipið Minsk, sem hannað er til að flytja landgönguliða til orrustu, og þá skemmdist einnig Kilo-kafbáturinn Rostov. Myndir benda til þess að bæði skipið og kafbáturinn hafi orðið fyrir miklum skemmdum.

Hafi Úkraínumönnum tekist að granda kafbátnum er þetta líklega í fyrsta sinn sem kafbáti nokkurrar þjóðar er grandað í átökum frá tímum seinni heimsstyrjaldarinnar. Þetta væri í það minnsta í fyrsta sinn sem Rússar missa kafbát í átökum frá seinni heimsstyrjöldinni.

Bretar skemmdu mikið argentískan kafbát, ARA Santa Fe, í árás í Falklandseyjastríðinu árið 1982. Bretar náðu í kjölfarið stjórn á kafbátnum en hann sökk svo við bryggju,  áður en hann var dreginn út á haf og sökkt þar.

Sky News segir árásina mögulega þá umfangsmestu gegn rússneska flotanum frá því innrás Rússa hófst í fyrra.

Það er bæði vegna þess að skipið og kafbáturinn hafi orðið fyrir skemmdum og þess að slippurinn í Sevastopol virðist einnig hafa orðið fyrir miklum skemmdum. Það gæti haft miklar afleiðingar þar sem mest allt viðhald á Svartahafsflota Rússa er sagt fara fram í Sevastopol.

Vonast eftir fleiri eldflaugum

Úkraínumenn fengu Storm Shadow stýriflaugar frá Bretum og sambærilegar stýriflaugar sem heita SCLAP frá Frökkum fyrr á árinu. Þær geta borið um 450 kílóa sprengihleðslu eru sagðar drífa rúma 250 kílómetra. Ekki liggur fyrir hve margar stýriflaugar voru sendar til Úkraínu en fjölmiðlar vestanhafs hafa sagt frá því undanfarna daga að Joe Biden, forseti Bandaríkjanna, ætli líklega að senda sambærilegar flaugar til Úkraínu á næstunni.

Þær kallast MGM-140 ATACMS og drífa allt að þrjú hundruð kílómetra. Munurinn á þeim og Storm Shadow er sá að hægt er að skjóta þeim á loft með HIMARS-vopnakerfum, sem Úkraínumenn hafa áður fengið frá Bandaríkjamönnum og Bretum. Storm Shadow er skotið af orrustuþotum.

Samkvæmt heimildum CNN hafa Bandaríkjamenn þó áhyggjur af því að þeir eigi ekki nægilega margar eldflaugar sjálfir. Lockheed Martin framleiðir um fimm hundruð ATACMS á ári en flestar þeirra eru þegar lofaðar öðrum bandamönnum Bandaríkjanna.

Úkraínumenn hafa þrýst mjög á Bandaríkjamenn að undanförnu um að senda ATACMS til Úkraínu og eru þeir meðal annars sagðir hafa vísað til þess hve vel Storm Shadow- og SCALP-flaugar hafa nýst þeim.