Dular­fullt hvarf skila­boða John­son enn ó­út­skýrt

Rannsóknin hefur staðið yfir í nokkurn tíma en vendingar urðu á málinu í gær þegar greint var frá því að ekki hefði tekist að nálgast WhatsApp-skilaboð forsætisráðherrans fyrrverandi sem send voru á tímabilinu þegar Covid-19 varð fyrst vart og fram yfir fyrstu samkomutakmarkanirnar.

Um er að ræða sex mánaða tímabil.

Johnson hefur neitað að hafa eytt skilaboðunum.

Það hefur tekið nokkurn tíma fyrir rannsóknarnefndina að komast yfir gögn málsins en ríkisstjórn Rishi Sunak neitaði í fyrstu að láta af hendi óritskoðuð samskipti Johnson, minnisbækur og dagbækur. Gögnin voru látin af hendi eftir dómsúrskurð.

Varðandi WhatsApp-skilaboðin bar Johnson því hins vegar við í fyrstu að hann gæti ekki nálgast þau þar sem þau væru geymd á gömlum síma og hann myndi ekki aðgangsorðið til að komast inn í hann. Með aðstoð tókst honum að komast inn í símann en ekki hefur tekist að endurheimta fyrrnefnd skilaboð.

Times greindi frá því í gær að þrátt fyrir ítrekaðar tilraunir sérfræðinga hefði það enn ekki tekist. Haft er eftir Johnson að ástæður þess að ekki sé hægt að nálgast skilaboðin séu ókunnar. 

Vonir standa til að flest skilaboðanna séu til hjá þeim sem Johnson átti í samskiptum við.

Hér má finna umfjöllun Guardian um málið.