Victor Osim­hen töfraði fram sann­kallaðar sirku­skúnstir

Osimhen var í þröngri stöðu í teig Cagliari þar sem í það minnsta þrír varnarmenn reyndu að hindra för hans. Hann gerði sér lítið fyrir og hélt boltanum á lofti nokkrum sinnum líkt og hann væri á æfingasvæðinu og skaut sér svo framhjá varnarmönnunum með því að flikka boltanum með nettum skalla.

Tilþrifin eru ótrúleg og minna óneitanlega á sirkuskúnstir sela sem eins og allir vita eru sérfræðingar í að halda boltum á lofti og stýra þeim með trýninu.

Osimhen var allt í öllu í sóknarleik Napólí í gær. Hann skoraði fyrra mark liðsins á 69. mínútu og lagði síðan upp sigurmarkið fyrir Khvicha Kvaratskhelia sex mínútum seinna. Með sigrinum fór Napólí upp í 4. sæti Seríu A, tveimur stigum á undan Róma sem sækja Bolgona heim í dag.