Tveggja daga líkams­meiðingar til á upp­töku

Þetta segir í úrskurði Landsréttar, sem kveðinn var upp í gær. Héraðsdómur Reykjavíkur hafði komist að sömu niðurstöðu þann 15. desember.

Dagbjört hefur nú sætt gæsluvarðhaldi í rétt rúmlega tólf vikur en það er hámarkstími gæsluvarðhalds án ákæru. Ákæra var gefin út á hendur Dagbjörtu á föstudag, sléttum tólf vikum eftir að hún var úrskurðuð í gæsluvarðhald fyrst.

Þegar Vísir óskaði eftir ákærunni á mánudag fengust þau svör að hún hefði ekki enn verið birt Dagbjörtu og því væri ekki unnt að afhenda hana. Eftir birtingu ákæru fyrir ákærða þurfa þrír sólarhringar að líða þar til heimilt er að verða við beiðni um afhengingu.

Það var mánudagsmorguninn 25. september sem lögreglan á höfuðborgarsvæðinu sendi frá sér tilkynningu um að 58 ára karlmaður hefði fundist meðvitundarlaus í félagsíbúð við Bátavog í Reykjavík laugardagskvöldið 23. september.

Kona um fertugt hefði verið úrskurðuð í gæsluvarðhald á grundvelli rannsóknarhagsmuna eftir að hafa verið handtekin í íbúð í austurborginni á laugardagskvöld.

Tilkynning hafði borist lögreglu sama kvöld og þegar lögregluþjónar mættu á staðinn hófu þeir þegar endurlífgunartilraunir. Hann var í framhaldinu fluttur á Landspítalann en úrskurðaður látinn við komuna.

Hafi verið með sjálfsskaðahugmyndir

Í staðfestum úrskurði héraðsdóms segir að rætt hafi verið við Dagbjörtu á vettvangi og hún hafi greint lögreglumönnum frá því að hinn látni hafi verið slappur og orkulaus dagana á undan. Hann væri jafnframt sídettandi og stæði vart í fæturnar. 

Í skýrslutöku 24. september síðastliðinn hafi hún kveðist lítið muna eftir umræddum degi en mundi þó eftir einhverjum átökum á milli hennar og hins látna auk þess sem hún hafi kveðið brotaþola hafa verið með sjálfsskaðahugmyndir og reynt að valda sjálfum sér áverkum. Hann hafi látið öllum illum látum inni á heimilinu og haft í hótunum við hana. Í síðari skýrslutökum hjá lögreglu hafi hún að miklu leyti neitað að tjá sig.

Líkamsmeiðingar til á upptöku

Þá segir að við rannsókn málsins hafi tvö vitni greint frá því að Dagbjört hafi verið að beita hinn látna ofbeldi að kvöldi 22. september. Rætt hafi verið við nágranna í húsinu sem heyrðu læti og öskur í karlmanni dagana 22. og 23. september.

Fyrir liggi myndbönd og hljóðupptökur frá 22. og 23. september síðastliðnum, tekin á síma hins látna og Dagbjartar. Myndefnið sé um tvær og hálf klukkustund að lengd og nái yfir tímabil frá hádegi á föstudeginum 22. september til rúmlega eitt næsta dag. 

„Á myndböndunum má sjá og heyra kærðu valda brotaþola ítrekuðum líkamsmeiðingum.“ 

Við réttarkrufningu hafi komið í ljós fjölþættir áverkar á hinum látna og fram komi í bráðabirgðaskýrslu réttarkrufningar að áverkamyndin hafi verið nægilega veigamikil til að valda dauða.

Fréttin hefur verið uppfærð.