Hann segir aldrei hafa verið meira að gera á sínum fimmtán ára ferli. Tæknin sé stærri partur af lífinu okkar. Við séum að nota ýmislegt sem við vitum ekki almennilega hvernig virkar.
„Þar leynast hætturnar fyrir okkur,“ segir Gunnar Ingi og að þar geti óprúttnir aðilar fengið okkur til að gera eitthvað sem við ættum ekki að gera. Gunnar Ingi ræddi þessi mál í Bítinu á Bylgjunni í morgun.
Krafan á einstaklinga sé miklu meiri í dag um að skilja hvernig tæknin og forritin virka. Rafræn skilríki, heimabaki, Facebook og Google. Svo við föllum ekki í gildrurnar þegar þær eru lagðar fyrir framan okkur.
Hann tekur dæmi um Messenger sem Meta hefur undanfarið verið að breyta og gera dulkóðaðan. Fólk hefur í kjölfarið lent í vandræðum með að finna fólk og samtöl. Það sé samt gert til að verja betur það sem fólk hefur skrifað.
„Það er þannig að manni er það annt um það sem maður hefur sett inn á Messenger og maður man ekkert almennilega hvað maður hefur sett inn. En ef einhver kæmist í þessi skilaboð væri það mögulega það versta sem hefur komið fyrir mann,“ segir Gunnar.
Hann segir Messenger nú öruggara en gerði það líka að verkum að forritið er ekki eins notendavænt og það var áður.
Ábyrgð notenda að huga að forvörnum
Gunnar segir það á ábyrgð notenda að nota tólin rétt. Þess vegna sé gott að skilja hvernig þau virka. Það eigi það sama við um einstaklinga og fyrirtæki. Það þurfi að huga að forvörnum.
„Það verða gerðar árásir,“ segir Gunnar Ingi og nefnir að um 46 þúsund árásir hafi verið gerðar á einu ári samkvæmt frétt Morgunblaðsins í dag. Það sé hægt að fullyrða að nánast öll fyrirtæki verði á einhverjum tímapunkti fyrir árás.
Gunnar Ingi segir áríðandi að læsi á stafrænt samfélag sé kennt í skólum. Hvernig samskipti við eigum og hvað sé ofbeldi. En mögulega vanti upp á kennslu um hverjum á að treysta og hverjum ekki. Svo sé eitt að vita af mögulegri dreifingu á Internetinu og annað að þekkja merki um gildrur.
Hann sagði frá því að sonur vinar hans hafi sem dæmi í síðustu viku verið plataður til að kaupa dót í tölvuleik á kort móður sinnar, án þess að vita að hann væri að kaupa. Það þurfi að fara vel yfir þetta með börnum.
Hann segir mikilvægt fyrir fyrirtæki að vera með forvarnir en líka að vera með viðbragðsáætlun tilbúna ef einhver kemst inn í kerfið. Það sé mikilvægt að geta undið fljótt ofan af því.
Glæpastarfsemi sem er rekið eins og fyrirtæki
Sá tölvuhakkarahópur sem hefur valdið mestum skaða á Íslandi er hópurinn Akira. Gunnar Ingi segir hann starfa að mestu í Rússlandi þó hann sé ekki á vegum rússneskra stjórnvalda. Þetta sé glæpastarfsemi en sé rekið eins og hvert annað fyrirtæki.
„Þetta er fólk sem mætir 8 í vinnuna og vinnur við það að finna leiðir til að komast inn,“ segir hann og að fyrirtækin séu með háa veltu.
Hann segir að við hverja tölvuárás sé farið í rannsókn og yfirleitt sé hægt að sjá hvaðan árásin kom. En oft skilji þeir líka eftir undirskrift og beita gagngíslatöku. Þar sem gögnin eru dulkóðuð og bjóða kóðann að gögnunum til sölu. Yfirleitt sé búið að rannsaka fyrirtækin sem er ráðist á vel til að komast að því hvað eigi að rukka fyrir kóðann. Þá segir Gunnar Ingi að meiri hætta sé á sumrin á árás því þá sé sumarstarfsfólk oft í vinnu sem sé ekki eins vant og þau sem eru fastir starfsmenn. Það sé hægt að fara í æfingar og greiningar til að koma í veg fyrir þetta. Þá leiti hakkararnir líka að þekktum veikleikum og reyni að komast inn í gegnum þá.
Gunnar Ingi segir að áður fyrr hafi mikil skömm fylgt því að lenda í svona árás en að það sé að breytast. Í því samhengi nefnir hann Brimborg sem varð fyrir árás en voru mjög opin með það hvað gerðist og hvað fór úrskeiðis.
Því meira sem er talað um svona árásir sé líklegra að fólk fatti að spyrja spurninga og bregðist ekki við.
