Evrópu­veisla á Stöð 2 Sport í kvöld

Kjartan Atli Kjartans­son og Albert Brynjar Inga­son verða á hliðar­línunni á Hlíðar­enda á leik Vals og St.Mir­ren frá Skot­landi, sem verður sýndur á Stöð 2 Sport þar sem að eftir leiki kvöldsins verður farið yfir öll mörkin úr leikjunum fjórum, sem fara fram í Sam­bands­deild Evrópu hér á landi í kvöld, og þeir leikir gerðir upp.

N1-völlurinn: Valur – St. Mir­ren | Stöð 2 Sport klukkan 18:45

Vals­menn tryggðu sér sæti í 2.um­ferð undan­keppni Sam­bands­deildarinnar með saman­lögðum 6-2 sigri í ein­vígi sínu gegn albanska liðinu Vllaznia á dögunum. Ein­vígi sem skapaði margar fyrir­sagnir eftir ó­læti albanskra stuðnings­manna á N1-vellinum í fyrri leik liðanna sem lauk með 2-2 jafn­tefli. Vals­menn þrýstu fætinum hins vegar fast niður á bensín­gjöfina í seinni leiknum í Albaníu og hrein­lega völtuðu yfir lið Vllaznia með 4-0 sigri fyrir viku síðan. Er það síðast leikur liðsins fyrir leik kvöldsins.

Skoska liðið St.Mir­ren er á yfir­standandi tíma­bili að taka þátt í Evrópu­keppni í fyrsta sinn síðan tíma­bilið 1987/88. Liðið tryggði sér þátt­töku­rétt í undan­keppni Sam­bands­deildarinnar með því að enda í 5.sæti skosku úr­vals­deildarinnar á síðasta tíma­bili. Tíma­bilið í Skot­landi er ekki hafið. St.Mir­ren hefur því undir­búið sig fyrir leik kvöldsins með æfingar­leikjum. Nú síðast gegn enska D-deildar liðinu Car­lis­le United, leik sem endaði með 2-2 jafn­tefli.

Víkings­völlur: Víkingur R. – Egna­tia | Stöð 2 Sport 5 klukkan 18:45

Á Víkings­velli í Foss­voginum taka ríkjandi Ís­lands- og bikar­meistarar Víkings Reykja­víkur á móti albanska liðinu KF Egna­tia. Um er að ræða fyrsta leik Víkings í undan­keppni Sam­bands­deildarinnar á yfir­standandi tíma­bili. Liðið tók fyrst þátt í undan­keppni Meistara­deildar Evrópu en laut þar í lægra haldi gegn írska liðinu Sham­rock Rovers og færðist því niður í Sam­bands­deildina.

Lið KF Egna­tia er ríkjandi meistari í Albaníu og féll, líkt og Víkingar, úr fyrstu um­ferð undan­keppni Meistara­deildar Evrópu. Þar laut liðið í lægra haldi FK Borac Banja Luka frá Bosníu í ein­vígi sem réðst á víta­spyrnu­keppni.

Sjá einnig:  „Erum búnir að skoða þá vel og það er fullt af fínum spilurum þarna“

Sam­sung­völlur: Stjarnan – Pai­de | Stöð 2 Besta deildin klukkan 19:00

Læri­sveinar Jökuls I. Elísa­betar­sonar lögðu norður-írska liðið Lin­fi­eld að velli í fyrstu um­ferð undan­keppni Sam­bands­deildarinnar með saman­lögðum 4-3 sigri. Í 2.um­ferð undan­keppninnar tekur við ein­vígi gegn eist­neska liðinu Pai­de Linna­mees­kond. Stjarnan vann 2-0 sigur á Fylki hér heima í að­draganda leiks kvöldsins.

Lið Pai­de er sem stendur í 4.sæti í eist­nesku úr­vals­deildinni og sau­tján stigum frá topp­liði Leva­dia Tallinn þegar að bæði lið hafa leikið tuttugu og einn leik. Leva­dia og Fl­ora Tallinn eru jafnan talin sterkustu lið Eist­lands og hafa þau jafnan ekki riðið feitum hesti frá viður­eignum sínum við ís­lensk lið. Pai­de lagði Bala Town frá Wa­les að velli í ein­vígi liðanna í fyrstu um­ferð. Ein­vígi sem réðst í fram­lengingu í seinni leik liðanna.

Sjá einnig: Stjörnu­menn út­troðnir af upp­lýsingum um næsta mótherja: „Það voru tveir fundir í gær“

Kópa­vogs­völlur: Breiða­blik – Drita | Stöð 2 Besta deildin 2 klukkan 19:15

Breiða­blik reynir að endur­taka leikinn frá því á síðasta tíma­bili og tryggja sér sæti í riðla­keppni Sam­bands­deildar Evrópu. Blikarnir lögðu norður-makedónska liðið Tikves að velli í fyrstu um­ferð undan­keppninnar með saman­lögðum 5-4 sigri í ein­vígi liðanna á dögunum og koma þeir fullir sjálfs­trausts inn í leik kvöldsins eftir 4-2 öruggan sigur á KR í Bestu deildinni milli Evrópu­verk­efna.

And­stæðingur þeirra í 2.um­ferð er lið FC Drita frá Kósovó sem er að hefja veg­ferð sína í Evrópu­keppni þetta árið með leiknum á Kópa­vogs­velli í kvöld. FC Drita endaði í 3.sæti efstu deildar Kósovó á síðasta tíma­bili, sem að lauk í júní síðast­liðnum ytra.

Sjá einnig: „Hér stígum við fast á bensín­gjöfina og höldum henni í botni í níu­tíu mínútur plús“

Við minnum svo á að eftir leiki ís­lensku liðanna í kvöld verður farið yfir öll mörkin úr leikjum þeirra og þeir leikir gerðir upp í beinni út­sendingu frá N1-vellinum á Hlíðar­enda á Stöð 2 Sport.