Gengið vel gegn Tyrkjum: Ferna Arnórs og ó­gleyman­legt kvöld í Eskisehir

Ísland og Tyrkland mætast í fjórtánda sinn í kvöld þegar strákarnir okkar sækja Tyrki heim til Izmir. Um er að ræða annan leik Íslands í Þjóðadeildinni en 2-0 sigur vannst á Svartfellingum á föstudaginn var.

Fyrst mættust liðin árið 1980. Lið Tyrkja sem Ísland mætti þar, í undankeppni HM 1982, var ekki beysið. Það tapaði öllum átta leikjum sínum í þeirri undankeppni.

Guðni Kjartansson stýrði Íslandi til 3-1 sigurs ytra í fyrstu viðureign þjóðanna í september það ár og Ísland vann leikinn hér heima ári síðar 2-0 þar sem Atli Eðvaldsson var á skotskónum.

Liðin drógust saman öðru sinni í undankeppni HM 1990. Þau skildu jöfn í Tyrklandi í október 1988 en Ísland vann 2-1 sigur á Laugardalsvelli ári síðar. Ísland vann þá 5-1 sigur í æfingaleik árið 1991.

Í þeim leik skoraði Arnór nokkur Guðjohnsen fjögur af sínum 14 landsliðsmörkum.

Árið 1994 unnu Tyrkir sigur á Íslandi í fyrsta sinn. Fatih Terim var þá tekinn við liði Tyrkja og stýrði liðinu til 5-0 bursts á drengjum Ásgeirs Elíassonar. Útlaginn Hakan Sukur skoraði meðal annars tvö marka Tyrkja í leiknum.

Terim var aftur þjálfari Tyrkja 20 árum seinna þegar Ísland vann 3-0 sigur á Laugardalsvelli í undankeppni EM 2016. Það var á meðal frækinna sigra í þeirri undankeppni sem veitti Íslandi sæti á stórmóti í fyrsta sinn.

Sjá: Selcuk Inan ræðir aukaspyrnumarkið sem skaut Tyrkjum á EM 2016

Ótrúlegt sigurmark Selcuk Inan beint úr aukaspyrnu á 89. mínútu í síðari leik liðanna í Tyrklandi í sömu undankeppni þýddi að Tyrkir fylgdu Íslandi á EM og gleðin mikil meðal beggja liða eftir þann leik.

Ísland og Tyrkland drógust aftur saman í riðil í næstu undankeppni, fyrir HM 2018. Terim var enn þjálfari Tyrkja þegar þeir töpuðu 2-0 á Laugardalsvelli en Rúmeninn Mircea Lucescu var tekinn við þegar einn fræknasti og frægasti sigur í sögu þjóðar vannst á Ataturk vellinum í Eskisehir.

Eftir þann leik sagði Eiður Smári Guðjohnsen félaga sinn Jón Daða Böðvarsson hafa eignað sér treyjunúmerið 22, en Jón Daði lagði upp mörk þeirra Jóhanns Berg Guðmundssonar og Birkis Bjarnasonar í fyrri hálfleiknum áður en Kári Árnason innsiglaði 3-0 sigur Íslands snemma í síðari hálfleik.

Sjá: Mörkin þrjú úr geggjuðum sigri Íslands í Eskisehir

Sá leikur fór langt með að tryggja sætið á HM í fyrsta sinn og það var sama kvöld sem Finninn Pyry Soiri varð þjóðhetja á Íslandi þökk sé jöfnunarmarki hans gegn Króatíu í riðli Íslands.

Sigur Íslands á Kósóvó í Laugardalnum þremur dögum síðar gulltryggði HM-sætið á kostnað Króata sem fóru í umspil – en komust þó á mótið og unnu sigur á íslenska liðinu í Rússlandi.

Síðast mættust Ísland og Tyrkland í undankeppni EM 2020. Ragnar Sigurðsson skoraði bæði mörk Íslands í 2-1 sigri í Laugardalnum en liðin gerðu markalaust jafntefli ytra.

Sigursins í Laugardalnum er þó helst minnst vegna uppþvottaburstamálsins, svokallaða. Mikill stormur varð í Tyrklandi vegna Belga sem beindi uppþvottabursta að Emre Belözöglu, þáverandi leikmanni Tyrklands, í Leifsstöð í aðdraganda leiksins.

Að neðan eru raktar allar 13 viðureignir Íslands og Tyrklands í gegnum tíðina.

Leikur Tyrklands og Íslands hefst klukkan 18:45 í kvöld og verður hann sýndur í beinni útsendingu og í opinni dagskrá á Stöð 2 Sport. Upphitun fyrir leikinn hefst hálftíma fyrr, klukkan 18:15.