Ís­lenskt verð­launa­lið selur klósett­pappír upp í ferð á stór­mót

Fim­leika­sam­band Ís­lands sendir fimm lands­lið til leiks á komandi Evrópu­mót í hóp­fim­leikum í Bakú sem hefst í næstu viku. Full­trúar Ís­lands héldu af landi brott til Aserbaís­jan í nótt.

Kvenna­lands­lið Ís­lands í hóp­fim­leikum er eitt þeirra liða sem keppir í Bakú en liðið hefur átt frá­bæru gengi að fagna undan­farin ár. Til að mynda vann það til gull­verð­launa á Evrópu­mótinu árið 2021 og nældi í silfur­verð­laun árið 2022.

Í raun ætti að vera ó­hætt að segja að liðið sé eitt þeirra lands­liða frá Ís­landi sem oftast hefur átt sæti á verð­launa­palli á stór­mótum undan­farin ár.

Það kunna því margir að reka upp stór augu þegar að þeir frétta af því að lands­liðs­fólk Ís­lands þarf að borga með sér fyrir þátt­töku á stór­mótum. Kemur þetta meðal annars til af lægri styrks til Fim­leika­sam­bands Ís­lands úr af­reks­sjóði ÍSÍ milli ára sem og hækkun kostnaðar fyrir sam­bandið.

„Sú stefna var sett fyrir ein­hverju síðan að við, sem myndum lands­liðið í full­orðins flokki, ættum ekki að þurfa borga með okkur í lands­liðs­verk­efni,“ segir Andrea í viðtali við íþróttadeild Stöðvar 2. „En af því að við fengum ekki jafn­mikið úr af­reks­sjóði ÍSÍ erum við að borga ein­hvern hluta af ferðinni sjálf. Það hefur alltaf verið þannig. Mér finnst það frá­bær stefna hjá Fim­leika­sam­bandi Ís­lands að þú séu að reyna koma til móts við okkur en svo þegar að sam­bandið fer ekki þá fjár­muni sem það hafði reiknað með þá breytist það náttúru­lega.“

Þá sé lítið annað hægt að gera en að fara í fjáröflun. 

„Selja klósett­pappír, lakkrís eða túlí­pana. Við höfum gert það. Labbað á milli húsa. Af því að það eiga ekkert allir efni á því að taka þetta upp úr eigin vasa.“

Er þetta stór upp­hæð sem hver og einn þarf að safna?

„Já. Sér­stak­lega í ung­linga­flokkunum. Svo erum við með nokkra tví­bura sem eru að fara á þessi mót. Fyrir þær fjöl­skyldur er þetta rosa mikill pakki. Full­orðins liðin eru að borga eitt­hvað undir hundrað þúsund kall á mann. Ung­linga­liðin nokkur hundruð þúsund á mann.“

Og stendur landsliðsfólk okkar í hópfimleikum ekki eitt í þessu stappi en áður hefur verið sagt frá landsliðsfólki sem þarf að borga með sér í landsliðsferðum í bæði handbolta og körfubolta og án efa er hægt að taka dæmi úr fleiri íþróttagreinum. Á sama tíma hefur forysta ÍSÍ á sama tíma kallað eftir hærra framlagi frá ríkinu til afrekssjóðs.

Þetta getur ekki átt að vera svona?

„Nei. Það fylgir þessu smá auka stress. Auka álag sem maður á ekki alveg að vera pæla í. Við erum ekki að fá borgað á neinn hátt fyrir að æfa í­þróttina eða að keppa. Svo þurfum við auka­lega að borga fyrir þetta. Það er smá súrt.“