Aftur eins marks tap en nú tekur EM við

Sviss vann einnig með eins marks mun á föstudaginn en sá sigur hefði í rauninni ekki getað verið tæpari því sekúndubrotum munaði að Íslandi tækist að jafna metin.

Í dag var Ísland líka með yfirhöndina drjúgan hluta leiksins og komust stelpurnar okkar til að mynda í 7-3 og 12-9 í hálfleik. Ísland var svo tveimur mörkum yfir, 22-20, þegar korter var til leiksloka, samkvæmt lauslegri leiklýsingu HSÍ, en missti Svisslendinga fram úr sér á lokakaflanum.

Samkvæmt Handbolta.is var Andrea Jacobsen markahæst í dag með níu mörk. Nýja landsliðskonan Dana Björg Guðmundsdóttir skoraði 5, Elín Klara Þorkelsdóttir 4, Perla Ruth Albertsdóttir 4/4, Steinunn Björnsdóttir 3 og þær Elín Rósa Magnúsdóttir, Katrín Tinna Jensdóttir og Rut Jónsdóttir 1 mark hver.

Til stóð að sýna frá leiknum á YouTube-rás HSÍ en Svisslendingar stöðvuðu það og vildu frekar að leikurinn færi fram án þess að sýnt væri frá honum, en einnig var um að ræða síðasta leik þeirra fyrir EM.

Holland tapaði líka í lokaleiknum

Ísland byrjar Evrópumótið á föstudaginn þegar liðið mætir Hollandi í Innsbruck. Vísir og Stöð 2 verða á staðnum og flytja fréttir af mótinu á hverjum degi.

Holland tapaði í dag naumlega fyrir Danmörku í Danmörku, 32-30, í síðasta leik sínum á æfingamóti sem nefnist Gulldeildin. Holland hafði áður steinlegið gegn norsku stelpunum hans Þóris Hergeirssonar, 33-21, en unnið Rúmeníu 41-26. Stelpurnar hans Þóris stóðu sig vel á mótinu en þær unnu 37-25 stórsigur gegn Rúmeníu í dag.