Dóms­mál setur á­form Heidelberg í upp­nám

Jón Hjörleifur ritar grein um málið á Vísi í dag en hann segist einn þeirra sem kærðu samninginn. Hann rekur að í dag hafi íbúakosning í Ölfusi hafist um hvort Heidelberg Materials fái að reisa verksmiðju í Keflavík nálægt Þorlákshöfn eða ekki. 

Kosningu lýkur þann 9. desember samhliða Alþingiskosningum. Jón Hjörleifur segir fyrirætlanir Heidelbergs hafi lengi verið mikið deilumál í sveitarfélaginu en færri viti þó af yfirstandandi málaferlum sem gætu orðið til þess að kippa fótunum undan verkefninu með öllu.

„Starfsemi fyrirhugaðrar mölunarverksmiðju Heidelbergs mun byggjast á efnistöku úr malarnámum í Litla-Sandfelli og Lambafelli. Þessi fell liggja við Þrengslaveg og eru í eigu Kirkju sjöunda dags aðventista. Trúfélagið gerði námuvinnslusamning við Eden Mining í upphafi árs 2022 en það fyrirtæki er í eigu tveggja aðventista, Eiríks Ingvarssonar og Kristins Ólafssonar. Í þessum samningi er gert ráð fyrir að Eden Mining semji við Heidelberg,“ segir í grein Jóns Hjörleifs.

Ósáttir aðventistar

Greinarhöfundur segir að ólíkt þeirri venju að upplýsa félagsmenn um áform sín hafi stjórn trúfélagsins ákveðið að halda samningaviðræðum sínum við Eden Mining leyndum með öllu. Margir meðlimir trúfélagsins séu afar ósáttir við þá leynd.

„En öllu alvarlegri þótti þeim undirritun samningsins sjálfs. Í átjándu grein laga aðventista stendur nefnilega: „Ákvörðun um kaup eða sölu á eignum Kirkjunnar sem ekki getur talist hluti af eðlilegri starfsemi hennar skal taka á reglulegum aðalfundi Kirkjunnar.“ Námuvinnsla er ekki hluti af venjulegri starfsemi Aðventkirkjunnar. 

Og malarnámurnar og jarðefnið í þeim eru verðmætustu eignir trúfélagsins. Það var því mat margra að stjórnin hefði ekki haft rétt til þess að taka einhliða ákvörðun sem fól í sér sölu á sama og öllu efninu í námunum og að það hefði þurft að leggja samninginn fyrir aðalfund til atkvæðagreiðslu og samþykkis.“

Ekki hægt að gefa sér neitt fyrirfram

Þetta leiddi svo til dómsmáls og stefnt var síðastliðinn júní. Dómskrafa stefnenda er að samningurinn verði dæmdur ólöglegur í ljósi þess að stjórnin hafi ekki haft leyfi til að skrifa undir hann.

„Ef Héraðsdómari úrskurðar stefnendum í vil er enginn samningur til staðar á milli trúfélagsins og Eden Mining. Án samnings við trúfélagið getur Eden Mining ekki samið við Heidelberg um efnistöku. Og án efnistöku úr fellunum tveimur hefur Heidelberg engar forsendur til þess að reisa mölunarverksmiðju.“

Jón Hjörleifur segir niðurstöðuna óvissa fyrirfram og vill hann hvetja alla Ölfusinga til að kjósa gegn Heidelberg-verksmiðjunni.