Stærstu mál stjórnarinnar bíða til 2026

Ríkisstjórnin mætti til síns fyrsta fundar í morgun og þótt ekkert frumvarp eða tillögur að þingsályktunum lægju fyrir fundinum stóð hann yfir í tvær og hálfa klukkustund. Kristrún Frostadóttir forsætisráðherra segir stefnuyfirlýsingu ríkisstjórnarinnar hafa verið rædda og ráðherrar upplýstir betur um það sem formenn flokkanna hefðu rætt sín í milli.

Eitt af megin markmiðum ríkisstjórnarinnar er að bæta hag eldri borgara og öryrkja og að miða skuli bótagreiðslur við launavísitölu. Ekki hefur komið fram hvað þetta muni kosta.

Hafið þið ekki reynt að komast að því hvað þetta myndi kosta?

„Jú við höfum gert það og teljum okkur hafa ágætis yfirsýn yfir hvað er raunhæft. Það er hins vegar ekki eðlilegt að mínu mati að birta svona smáatriði í stefnuyfirlýsingu. Þetta er bara samkomulagsatriði okkar á milli. Það mun auðvitað blasa við strax í fyrstu fjármálaáætlun hvernig landið liggur. Eins þegar þingmálaskráin kemur fram,“ segir Kristrún.

Launaskrið sem yfirleitt nær eingöngu til hæstu launa mælist einnig í launavísitölu. Því gætu bætur með tímanum orðið meiri en lágmarkslaun í landinu. Forsætisráðherra segir ríkisstjórnina einfaldlega ætla að fylgja lögum um að bætur hækki ýmist samkvæmt launa- eða verðlagsvísitölu eftir því hvor þeirra væri hærri.

„Við munum auðvitað finna út úr því hvaða viðmið er hentugt vegna þess að við viljum auðvitað ekki raska ró á almennum vinnumarkaði. Það er hins vegar uppi sú staða að það munar um hundrað þúsund krónum greiðslum sem koma frá almannatryggingum og lægstu launum í landinu og sú kjaragliðnun getur ekki haldið áfram,“ segir forsætisráðherra.

Forystukonur flokkanna hafi hins vegar lagt áherslu á að ekki verði farið í sérstök útgjöld að ráði á næsta ári þótt einstök atriði í gildandi fjárlögum verði skoðuð.

„Vegna þess að það er mjög mikill einhugur um að passa upp á að við sjáum verðbólgu hjaðna. Við sjáum þensluna minnka og vextina lækka,“ sagði Kristrún Frostadóttir að loknum fyrsta ríkisstjórnarfundi sínum í dag. Það væri forgangsatriði og því gæfist tími til að útfæra önnur stefnumál nánar. Þó verði útgjöld til meðferðarúrræða aukin strax á næsta ári enda þörfin brýn.