Bjarni og Þórður búnir að segja af sér

Þórunn Sveinbjarnardóttir, nýkjörinn forseti Alþingis, las upp bréf þeirra tveggja þess efnis á fyrsta fundi nýs þings í dag.

Bjarni Benediktsson tilkynnti í janúar að hann væri á leið úr pólitíkinni. Hann hygðist ekki taka sæti á Alþingi samhliða því að hann myndi ekki gefa kost á sér til áframhaldandi setu sem formaður Sjálfstæðisflokksins á komandi landsfundi.

Við afsal þingmennsku Bjarna tekur Jón Gunnarsson, fyrrverandi dómsmálaráðherra, við þingsætinu.

Þórður Snær tilkynnti í aðdraganda kosninganna 30. nóvember að hann ætlaði sér ekki að taka sæti á Alþingi kæmist hann á þing. Þá ákvörðun tók hann í kjölfar þess að gamlar bloggfærslur hans voru rifjaðar upp, en í þeim þótti hann lýsa óviðurkvæmilegum viðhorfum í garð kvenna. 

Eftir kosningarnar var greint frá því að Þórður yrði fram­kvæmda­stjóri þing­flokks Sam­fylkingarinnar.

Í stað Þórðar mun Sigmundur Ernir Rúnarsson, fyrrverandi ritstjóri Fréttablaðsins, taka við þingsætinu.