Ætla að hlífa trjám þegar golf­brautir verða mótaðar á skógræktar­svæði

GKG sér nú fram á að missa stóran hluta af Mýrinni, níu holu golfvelli í Vetrarmýri, vegna íbúðabyggðar sem Garðabær hefur skipulagt í Hnoðraholti. Landið verður nýtt undir knattspyrnuvelli og skóla sem á að þjóna nýju byggðinni.

Til þess að bæta golfklúbbnum missinn liggur nú fyrir tillaga um að hann fái í staðinn land í Smalaholti þar sem skógur hefur verið ræktaður upp undanfarna áratugi. Smalaholt er fyrsta svæðið sem fékkst til skógræktar í Garðabæ og var forsenda þess að Skógræktarfélag Garðabæjar var stofnað árið 1988.

Skógræktarfélagið hefur bent á að skorið sé af neðsta hluta trjásýnisstígs sem liggur um Smalaholt í uppdráttum af golfvallarsvæðinu og vill að nýju brautirnar verði fjær stígnum en gert er ráð fyrir í uppdráttum samkvæmt umsögn sem það sendi inn um skipulagstillöguna.

Agnar Már Jónsson, framkvæmdastjóri GKG, segir klúbbinn vinna þétt með skógræktarfélaginu og Garðabæ sem hafi sameiginlega hagsmuni að búa til útivistarsvæði fyrir íbúa. Eðlilegt sé að stórar spurningar komi upp í breytingarferli sem þessu.

„Skógurinn er ekkert að fara. Við erum að fara móta golfbrautir í skóglendi og við munum gera okkar besta til að hlífa trjágróðrinum,“ segir hann.

Þrátt fyrir það sé óumflýjanlegt að einhver tré verði felld. Agnar Már segir að stefnt verði að því að gróðursetja að minnsta kosti jafnmörg tré og verði felld. Hann bendir ennfremur á að klúbburinn sé í og með skógræktarfélag því hann hafi plantað um 3.500 plöntum á vallarsvæðum sínum. Hann muni taka við trjágróðrinum í Smalaholti og hlúa að honum eins og hann hafi gert á sínu svæði til þessa. 

„Markmiðið er að búa til útivistarsvæði fyrir almenning sem er á heimsmælikvarða,“ segir framkvæmdastjórinn.

Níu nýjar brautir og breytingar á þremur

Gríðarlegar framkvæmdir við að breyta vallasvæði GKG eru framundan. Klúbburinn heldur úti tveimur völlum, Leirdalsvelli og Mýrinni, sem eru saman 27 holur. Sá fjöldi heldur sér eftir breytingarnar en leggja þarf níu nýjar brautir og breyta legu og hönnun þriggja brauta svo að boltar skeikulla kylfinga lendi ekki inni í íbúðabyggð.

Agnar Már segir að framkvæmdirnar langtímaverkefni og að þær gætu tekið allt að tíu til fimmtán ár. 

„Við munum gera þetta þannig að það verði sem minnst rask fyrir félagsmenn. Garðabær hefur góðan skilning á því að það þurfi að passa upp á þá þætti,“ segir hann.

Ekkert sé að vanbúnaði að hefja framkvæmdirnar þegar deiliskipulag hefur verið samþykkt. Tæknilega séu þær þegar hafnar þar sem byrjað sé að móta tvær flatir á nýja vellinum. 

Ekki liggur fyrir hvenær Mýrinni verður lokað og ræðst tímasetningin af uppbyggingu íbúðabyggðarinnar.

„Þar er það svolítið sveitarfélagið sem ræður ferð, hversu hratt það ætlar að byggja upp Hnoðraholtið,“ segir framkvæmdastjórinn.

Þegar Mýrin verður aflögð færir klúbburinn æfingasvæði sitt þangað. Agnar Már segir að þar verði lítið höggsvæði, par þrjú holu völlur og vipp- og glompusvæði.

Staða klúbbsins verði að minnsta kosti jafngóð eftir breytingar og fyrir

Fyrsta stóra framkvæmdin sem er fyrirhuguð hjá GKG er bygging nýrrar vélasmiðju eða þjónustumiðstöðvar golfvalla í stað þeirrar sem víkur fyrir íbúðabyggðinni. Hún á að rísa sunnan núverandi bílastæðis klúbbsins.

Agnar Már segir nýja þjónustumiðstöð hafa setið lengi á hakanum. Núverandi aðstaða sé orðin óboðleg. Hann gerir ráð fyrir að Garðabær og Kópavogur taki þátt í fjármögnuninni með klúbbnum.

Hvað fjármögnun á stóru framkvæmdunum við breytingarnar á vellinum sjálfum varðar vísar framkvæmdastjórinn til viljayfirlýsingar sem Garðabær skrifaði undir fyrir sjö árum þar sem sveitarfélagið skuldbatt sig til þess að tryggja að klúbburinn yrði að minnsta kosti jafnvel settur eftir breytingarnar og fyrir. Í því felist að bærinn greiði fyrir framkvæmdirnar

„Ef við förum eitthvað fram úr okkur þá eðli málsins samkvæmt þá greiðir GKG það en í anda viljayfirlýsingarinnar mun Garðabær skilja við þetta verkefni þannig að við séum að minnsta kosti jafnvel sett,“ segir framkvæmdastjórinn.