Sterkari merki en fyrir síðustu eld­gos

Þetta segir í tilkynningu frá Veðurstofunni.

„Merkin sem sjást sýna að kvikan er að hreyfa sig bæði til norðausturs en einnig í suður í átt að Grindavík. Á þessu stigi er ekki hægt að fullyrða um hvar kvikan muni koma upp, en færslan á aflögunarmerkjum til suðurs sáust til að mynda ekki í eldgosinu sem hófst í nóvember 2024.

Viðbragðsaðilar í Grindavík segjast finna fyrir jarðskjálftum í bænum og þar sjást einnig merki um aflögun og því mögulegt að sprunguhreyfingar geti átt sér stað innan bæjarins.“

Meiri jarðskjálftavirkni en í síðustu gosum

Jarðskjálftavirkni hefur verið meiri en hún var í undanfara allra síðustu eldgosa á Sundhnúksgígaröðinni. Skjálftarnir hafa verið fleiri og stærri og hafa borist fregnir af því að þeir hafi fundist víða á Suðurnesjum og á höfuðborgarsvæðinu.

Samkvæmt upplýsingum frá Veðurstofu Íslands er virknin mest á sprungulínunni.

Kvikuhlaup hófst um klukkan hálf sjö og hefur því staðið yfir í tvo og hálfan klukkutíma, sem er einnig lengur en í allra síðustu gosum á svæðinu.

Fylgst er með gangi mála í vaktinni, hér.