„Hvílíkur léttir að vera loksins komin inn á völlinn aftur“

Kolbrún viðurkenndi að það fylgdu þessari innkomu blendnar tilfinningar í ljósi úrslitanna en Njarðvík vann 72-89 sigur í Umhyggjuhöllinni og er komið í 2-0 í einvíginu.

„Það er auðvitað frábært að vera komin aftur inn á völlinn, bara „hvílíkur léttir að vera loksins komin inn á völlinn aftur“. Á sama tíma þá erum við komnar með bakið upp við vegg, við verðum að vinna næsta leik. Það er bara ekkert annað í stöðunni.“

Njarðvíkingar eru með þrjá erlenda leikmenn í sínum röðum sem varnarmenn Stjörnunnar þurftu að hafa mikið fyrir að hægja á í kvöld og Kolbrún sagði það vera ærið verkefni.

„Erlendu stelpurnar eru allar frábærar. Emilie ótrúlega klár í körfubolta. Brittany náttúrulega rugl góð. En við verðum bara að finna leiðir til að stoppa þær og við ætlum að gera það.“

Hvaða leiðir það eru vildi Kolbrún ekki gefa upp en planið fyrir miðvikudaginn er einfalt.

„Við ætlum að fara til Njarðvíkur og bara gera okkar besta og vinna. Það er alveg klárt mál að við ætlum að vinna.“

Kolbrún spilaði rúmlega 21 mínútu í kvöld og skoraði 17 stig en sagðist enn eiga eitthvað í að ná sér 100 prósent góðri.

„Ég myndi segja að ég væri svona 80 prósent. Ég er ennþá á smá mínútufjölda því ég er ennþá að jafna mig eftir ökklann. En þetta er allt að komast, loksins, þannig að ég er bara mjög ánægð með framhaldið.“

Hún viðurkenndi fúslega að ef þjálfarateymi Stjörnunnar væri ekki með hemil á mínútum hennar hefði hún örugglega spilað meira en sýndi stöðunni skilning

„Auðvitað myndi ég gera það.“ - Sagði Kolbrún og hló. „Ég vil alltaf spila og gera allt sem ég get til að hjálpa liðinu mínu. Auðvitað er erfitt að sitja á bekknum en ég skil þetta. Ég er bara að koma til baka og þetta tekur tíma.“