Einn besti leik­maður KR frá næsta mánuðinn hið minnsta

Þessi skemmtilegi vængmaður þurfti því miður að fara meiddur af velli þegar KR lagði ÍBV 4-1 á dögunum. Liðin mætast að nýju í Mjólkurbikarnum á morgun, miðvikudag, en þar verður Luke fjarri góðu gamni. Raunar verður hann frá næstu vikurnar. Það staðfesti þjálfari KR, Óskar Hrafn Þorvaldsson, í viðtali við Fótbolti.net.

Bjartsýn spá er að Luke snúi aftur að loknu landsleikjahléi en þar sem um er að ræða tognun aftan í læri gæti verið að hann verði lengur frá keppni. Þetta er mikið högg fyrir KR enda margir leikmenn liðsins að glíma við meiðsli.

Aron Sigurðarson var ekki með gegn ÍBV en gæti náð bikarleiknum. Júlíus Mar Júlíusson var fyrirliði í fjarveru Arons en fór einnig af velli gegn ÍBV og missir allavega af leiknum í Vestmannaeyjum. Óskar Hrafn vildi ekki fullyrða hversu lengi hann yrði frá.

KR verður án Stefáns Árna Geirssonar allt tímabilið. Hrafn Tómasson hefur ekki enn komið við sögu en Óskar Hrafn býst við honum til baka á næstu vikum. Alexander Helgi Sigurðarson hefur ekki enn byrjað leik í sumar, sömu sögu er að segja af Guðmundi Andra Tryggvasyni.

Þá hefur Birgir Steinn Styrmisson aðeins komið við sögu í einum deildarleik en hann var í byrjunarliðinu þegar KR mætti FH í Kaplakrika. Hann var hins vegar tekinn af velli þegar aðeins stundarfjórðungur var liðinn.