„Arfa­vit­laus lausn“ að minnka aflann í hverri veiði­ferð

Í frumvarpinu sem lagt hefur verið fram bætist nýtt ákvæði við strandveiðilögin til bráðabirgða, sem kveður á um að vikið verði frá skyldu Fiskistofu til að stöðva veiðar þegar útlit er fyrir að leyfilegum hámarksafla verði náð.

Í greinargerðinni segir að miðað við fjölda strandveiðibáta í sumar og veiðimynstur undanfarinna ára megi áætla að auka þurfi það aflamagn sem til ráðstöfunar er á strandveiðitímabilinu 2025. Til standi að færa aflaheimildir til innan 5,3 prósent kerfisins, og hugsanlega þurfi að gera breytingar á leyfilegum hámarksafla í hverri veiðiferð.

Betra væri að fækka dögum

Kjartan segir að hugmyndin sem viðruð er í greinargerðinni um að hugsanlega þurfi að minnka leyfilegan afla í hverri veiðiferð sé „arfavitlaus lausn, og engin lausn í rauninni.“

„Maður veltir því fyrir sér hvaðan þessi hugmynd kom, og af hverju það var einu sinni rætt að hafa hana í frumvarpinu, ég efast um að hún hafi komið frá ráðherra,“ segir hann.

Það vekur athygli Kjartans að hugmyndin sé viðruð í greinargerðinni en ekkert sé um þetta að finna í frumvarpinu sjálfu.

„Ég held að það komi ekki til þess að þetta verði gert. Hvers vegna þau viðra þessa hugmydn, ég hreinlega skil það ekki,“ segir hann.

Betra væri að fækka strandveiðidögunum en að grípa til slíkra ráðstafana.

„Þetta væri versta mögulega lausnin, kostnaður væri sá sami og olíunotkun sú sama og að ná í 774 kíló. Allur tilkostnaður yrði sá sami, minni afli fyrir sama kostnað, þannig þetta væri alveg það alversta í stöðunni,“ segir Kjartan.

„Þetta verða aldrei nein tuttugu, þrjátíu þúsund tonn“

Kjartan segir það afar ólíklegt að heildarafli strandveiðanna verði tuttugu eða þrjátíu þúsund tonn eins og talað hefur verið um, fái bátarnir að veiða alla 48 daga tímabilsins.

„Það kemur bara frá reiknistofu SFS og á ekki við nokkur einustu rök að styðjast,“ segir Kjartan.

Hann segir að afli strandveiðanna hafi verið tuttugu prósent minni í maímánuði en á sama tíma í fyrra.

„Ég hugsa að það stafi meðal annars vegna þes að menn hafa verið rólegri vitandi það að þeir fá þess 48 daga, og það hefur ekki verið sami sperringur að fara út í brælu bara af því maður veit ekki hvernig spilast úr vertíðinni,“ segir Kjartan.

Ekki gott að senda reikninginn fram í tímann

Í frumvarpinu segir að viðbótaraflamagn sem ráðherra ráðstafar til strandveiða skuli dragast frá því aflamagni sem dregið verður f´ra heildaraflamarki og lækka árlega. Það skuli að fullu fært til baka eigi síðar en á fiskveiðiárinu 2028/2029.

Bergþór Ólason þingmaður Miðflokksins sagði að með þessu væri ríkisstjórnin að senda gúmmítékka á næstu ríkisstjórn, þar sem það stæði ekki til að jafna viðbótaraflamagnið út fyrr en á kjörtímabili næstu ríkisstjórnar.

Kjartan Páll segist hafa áhyggjur af því að mögulegt viðbótaraflamagn eigi að draga úr aflamagni á næstu árum.

Hann telur að Hanna Katrín atvinnuvegaráðherra vilji gefa sjálfri sér svigrúm til að „gera þetta almennilegt til frambúðar.“

„Um leið þá er það þannig að Hanna Katrín erfði ráðuneyti þar sem búið var að ráðstafa öllum fiskveiðiheimildum ársins, þannig það er svolítið erfitt fyrir hana að stíga inn í þetta þegar fiskveiðiárið er hálfnað og finna út úr þessu.“

„Ég trúi því að það sé vilji fyrir hendi hjá þessari ríkisstjórn að vinna betur að þessu máli.“

„Aðalpunkturinn í þessu er sá að hún var búin að lofa okkur 48 dögum í sumar, og ég sé ekki annað þarna en að hún ætli að standa við það. Það eru náttúrulega gleðilegar fréttir, en maður hefur áhyggjur af því hver er að ráðleggja henni ef ráðleggingarnar eru af þessum toga,“ segir Kjartan Páll.