Leiknir lætur þjálfarann fara

„Þessi ákvörðun er mjög þungbær. Óli er mikill Leiknismaður og honum er þakkað góð störf eftir að hafa tekið við liðinu í erfiðri stöðu á síðasta ári“ segir í tilkynningu Leiknis á Facebook. Eftirmaður Ólafs er enn ófundinn.

Hinn 34 ára gamli Ólafur er fyrrum fyrirliði Leiknis og tók við störfum eftir sjö umferðir á síðasta tímabili, þá var liðið í neðsta sæti en endaði undir hans stjórn í áttunda sætinu. Ólafur fékk samning sinn framlengdan en hefur ekki vegnað vel á þessu tímabili.

Leiknir hefur aðeins skorað fjögur mörk en fengið á sig átján í fyrstu fimm leikjunum. Jafntefli náðist í fyrstu umferðinni gegn Þrótti en síðan hefur liðið tapað fjórum leikjum í röð. Síðast í gærkvöldi gegn Grindavík, 2-6 eftir að hafa lent 0-6 undir.