Sann­færð um sak­leysi eigin­mannsins og segir hann hetjuna sína

Ása veitti heimildaþáttagerðarmönnum viðtal þar sem hún ræðir morðin og fjölskyldulífið. Hún segir rangan mann í haldi. Þáttaröðin The Gilgo Beach Killer: House of Secrets kemur út á morgun en stiklu úr þáttunum má sjá hér að neðan.

Í þáttunum segir hún að „dásamlegi“ eiginmaður hennar sé ekki „skrímslið“ sem myrti og limlesti sjö vændiskonur á Long Island í New York-ríki yfir þrjátíu ára skeið.

„Ég veit hvað vondir menn eru færir um að gera. Ég hef séð það og heyrt af því frá öðrum mönnum. Ekki eiginmaður minn. Þið eruð með rangan mann,“ segir hún.

Ása Ellerup er 61 árs gömul ættleidd dóttir íslenskra innflytjenda til Bandaríkjanna. Hún sótti um skilnað skömmu eftir handtöku Heuermann. Hún segist hafa gert það til að vernda eigur þeirra hjóna en hún er sannfærð um sakleysi mannsins síns.

„Ég vil fá hann aftur heim,“ segir hún.

„„Þú hlýtur að hafa vitað.“ Vitað hvað? Maðurinn minn var hérna heima. Hann er fjölskyldumaður, punktur,“ segir hún.

Haugur af sönnunargögnum

New York Post fjallar um málið. Þar segir að Heuermann hafi verið handtekinn í júlí ársins 2023 á skrifstofu sinni á Manhattan. Þar rak hann arkítektúrstofu. Hann var ákærður fyrir morðin á þremur vændiskonum. Síðar var hann ákærður fyrir morð og limlestingu á fjórum fórnarlömbum til viðbótar. Þau voru öll vændiskonur. Hann á að hafa geymt fréttaúrklippur þar sem fjallað var um morðin í bílskúr þeirra hjóna.

Ása trúir enn heitt á sakleysi eiginmannsins síns og það þrátt fyrir „haug af sönnunargögnum,“ eins og New York Post lýsir því. Erfðaefni hefur fundist á líkum hinna myrtu, ekki aðeins af Heuermann heldur einnig Ásu sjálfri og dóttur þeirra Victoria.

Í þáttunum er greint frá því að þau hjón hafi kynnst þegar Ása var átján ára gömul og vann í verslun 7-11 á Long Island. Þau hafi myndað sterka tengingu sem varð að ástarsambandi en þau voru bæði gift þegar þau kynntust. Þau giftu sig í Svíþjóð árið 1995.

Ása segir að sér hafi verið nauðgað af bekkjarfélaga þegar hún var sextán ára gömul og að í kjölfarið hafi hún gert sjálfsvígstilraun. Hún hafi einnig þurft að fela sig í ruslagámi í fleiri klukkustundir þegar reynt var að ræna henni þegar hún var nítján ára gömul en Heuermann hafi komið henni til bjargar.

„Hann er hetjan mín,“ segir Ása.

Fyrsta fangelsisheimsóknin eins og fyrsta stefnumótið

Samkvæmt umfjöllun New York Post er Ása í afneitun varðandi ýmislegt sem fram hefur komið við rannsókn málsins. Á heimili þeirra hafa meðal annars fundið gróft og ansi brenglað klám. Ása segist ekki vita hvort að efnið hafi verið í vörslu Heuermann. Hún segist jafnframt ekki trúað því að hann hafi sóst í þjónustu vændiskvenna.

Ása sótti líkt og fyrr segir um skilnað stuttu eftir handtöku Heuermann en hún talar samt sem áður reglulega við hann í síma.

„Ég hef ekki séð hann svo lengi og þegar ég fór þangað niður eftir var ég spennt. Ég var eins og vriá fyrsta stefnumóti. Maður er taugaveiklaður, maður er hræddur. Maður veit ekki hvernig stefnumótið á eftir að verða,“ segir hún.