Benfica vann Bayern og vann riðilinn

Bayern nægði jafntefli til að vinna riðilinn en stórsókn liðsins í seinni hálfleik bar ekki árangur.

Þetta er í fyrsta sinn í sögunni sem Benfica nær að vinna Bayern.

Norðmaðurinn Andreas Schjelderup skoraði sigurmark Benfica strax á þrettándu mínútu leiksins eftir sendingu frá Gianluca Prestianni.

Harry Kane, Michael Olise og Joshua Kimmich komu allir inn á sem varamenn í hálfleik og þýska liðið var oft nálægt því að skora markið sem það þurfti til að tryggja sér efsta sætið.

Joshua Kimmich skoraði reyndar mark í seinni hálfleiknum en markið var dæmt af vegna þess að Harry Kane stóð í rangstöðu fyrir framan markvörðinn.

Þetta þýðir að Benfica vinnur riðilinn og mætir annað hvort Chelsea eða Espérance de Tunis frá Túnis í sextán liða úrslitum keppninnar. Portúgalarnir mæta liðinu í öðru sæti í D-riðlinum en Chelsea og Espérance de Tunis mætast í nótt í hreinum úrslitaleik um það sæti.

Með því að enda í öðru sæti í riðlinum vita Bæjarar að þeir mæta brasilíska liðinu Flamengo í útsláttarkeppninni en Brassarnir eru búnir að vinna D-riðilinn.