FH-ingar flytja Kapla­krika í Laugar­dalinn

Liðið mætir KR á Avis vellinum í Laugardal á morgun en Sigurður Bjartur Hallsson talaði um það í viðtali á dögunum að FH-ingar þyrftu að finna leið til að flytja frammistöður sínar í Kaplakrika á útivöll og þá gæti stigasöfnun liðsins hafist fyrir alvöru.

Einn af dáðustu sonum Hafnarfjarðar og fyrrum vallarstarfsmaður í Kaplakrika, Friðrik Dór, virðist hafa tekið ákalli Sigurðs bókstaflega og tók málin í sínar hendur eins og sést í myndbandinu hér að neðan.

Friðrik viðurkennir reyndar undir lok myndbandsins að hann hafi ekki áður lagt túnþökur á gervigras og sennilega sé ólíklegt að þær nái að skjóta rótum. Við munum því sennilega ekki sjá nýtt gras á Avis vellinum á morgun þegar FH sækir KR heim en leikurinn er í beinni útsendingu á Sýn Sport á morgun og hefst útsendingin klukkan 19:00.